Aurten Kopa hiru egunetan burutuko da, hau da, ostiralean hasita igandera arte eta Amaya Valdemoro pabeloian jokatuko dira zazpi partidak. Zozketan, zerrenda buruak atera dira aurrena, Bera Bera eta Helvetia Alcobendas, lehenengo itzulian líder eta bigarrena bukatu ostean. Azkeneko hiru edizioetan bi talde hauek izan dira finalera iritsi direnak: 2011 Telden, Itxako eta Elda; 2012an Altean, Itxako eta Bera Bera eta iaz Porriñon, Bera Bera eta BM Rocasa.
Halere, Kopa oso txapelketa berezia da eta ezusteak ugari dira. Iaz Porriñon, final-laurdenetan Zuazo Barakaldo Bera Bera kanporatzeko zorian egon zen. Donostiarrak luzapenean gainditu zuten bizkaitarrak eta gogoratzekoa da, besteak beste, Ana Temprano orduan Zuazon egindako partida.
Denboraldi honetan, Bera Berak eta Zuazok lau aldiz elkar ikusi dute: Ligako bi partida, Euskadiko kopan eta bi lagunartekoetan. Donostiarrak nagusi izan dira beti baina Ligako bi partidan, Lasesarren eta Bidebietan, Zuazok estu hartu zituen gipuzkoarrak.
Horrela, final-laurdenak gaindituta, Mecalia Atlético Guardés vs Mar Alicante taldeek osatzen duten kanporaketaren garaile izango dute aurrez aurre. Zozketaren beste aldean, Helvetia Alcobendasek BM Porriño izango du aurkari eta Elche Mustang taldeak BM Rocasa.
Koparako ordutegiak honako hauek dira: ostiralean 12,30, 16, 18 eta 20etan, nahiz eta oraindik ez diren zehaztu. Final-erdiak larunbatean izango dira 13,30etan (Teledeporte zuzenean) eta 16etan (Teledeporte diferituan) eta finala igandean 13etan (Teledeporte zuzenean).
Bera Berarentzat 23. partaidetza jarraia suposatuko du, izan ere, ohorezko mailara igo eta hurrengo urtean iritsi zenetik ez baitu hutsik egin, 1992az geroztik hain zuzen. Eta hirugarren urte jarraian zerrendaburu izango da, aurten Helvetia Alcobendasekin batera. Ondorioz, aurreneko itzulia amaieran zein gaur egun sailkapenean liderrak eta bigarrenak balizko finalean baino ez dute elkar ikusiko.
Gipuzkoarrak hiru txapelketa eskuratu dituzte (2007, 2009 eta 2013) eta beste sei edizioetan finaleraino iritsi ziren (1993, 1996, 1997, 2006, 2008 eta 2012).
Edizioak eta aurkariei erreparatuz, orduan Corteblanco Bidebietak 1993an iritsi zen aurreneko aldiz finalera Pinton. Final-laurdenetan Valencia Urbana gainditu zuen, ondoren Remudas eta finala Mar Valenciaren aurka galdu zuen (21-29). Zerrendari begiratuz gero, Espainiako eskubaloiak bizi izan duen aldaketa agerian jartzen da: Iber-Mar Valencia-Mar Osito- Sagunto, Ferrobús Mislata-Ribarroja, Elda, Itxako... arrazoi ezberdinegatik ez direlako egun ohorezko mailako taldeak.
Horrela, Alcobendasen Bera Berarekin zozketa bat egingo dutenen artean, Teldekoa da - lehen Remudas eta orain BM Rocasa Ace Gran Canaria- Kopan gehien ikusi duen taldea, guztira bost kanporaketa, hain zuzen. 2000. urtean baino ez ziren kanariarrak nagusitu, gainontzekoak donostiarrak garaile izan ziren. Finala bakarra jokatu zuten, iaz Porriñon (25-24). Egun sasoi onean da Rocasa eta akaso Bera Berarentzat aurkari zailena biharko zozketan.
Ligan goiko postuetan diren hiru taldeaz gain, aurtengo Kopan Galizako bi taldeak errepikatuko dute Mecalia Atlético Guardés eta BM Porriño, Zuazo Barakaldo eta Mediterráneori so, Elche Mustang eta Mar Alicante. Izan ere, Bera Berak Alacanteko aurkaria izan du askotan. Mar Alicante izan ezik, azkeneko zortzi edizioetatik sei aldiz donostiarrek Elda Prestigio eta Elche izan dituzte aurrez aurre eta Telden 2011an baino ez amore eman, orduan Elda nagusi izan baitzen (29-34). Azkeneko bi urtetan, 2012an Altean eta iaz Porriñon, Bera Berak Elche gainditu zuen final-laurdenetan eta final-erdietan.
Horrela, biharko zozketan izango diren taldeen artean Guardés, Porriño eta Mar Alicante dira orain arte, 22 edizioetan, Bera Bera ikusi ez dituen aurkariak. Halere, argi dago edizio guztietan eman den beste ezaugarri bat, talde onenak gainditu beharko ditu txapela berriro lortzeko, hain zuen.
Partida honek Ligako 17. Jardunaldia irekiko du bihar. Ordubete beranduago Mecalia Atlético Guardés- Helvetia Alcobendas hasiko da A Guardan. Hau da, bosgarrenak liderra hartuko du eta laugarrenak, bigarrena. Porriñon partida amaitzen denean BM Rocasa-Kukullaga Etxebarri hasiko da Telden.
Bera Berak azkeneko bi partidetako deialdia osatu du. Bidaian da taldekideekin Porriñoko jokalari Vero Cuña, taldearekin entrenatzen ari dena baina Imanol Álvarezen deialdian sartzeko oraindik falta zaiona.
Etxetik kanpo azkeneko bi norgehiagokak galduta, Alacanten eta Telden, gipuzkoarrek sentsatzio onak eta konfidantza berreskuratu nahi dute eraso jokua ardatz duen aurkari baten aurrean. Izan ere, BM Porriñon Bera Berak baino bost gol gehiago sartu ditu, hau da, partidako 28 baino gehiago; etxean, gainera, 30.
Valencia Canyamelar taldeak baino ez du Porriñon garaipenik lortu oso gol gutxiko partidan (18-21). Norgehiagoka hau kenduta, galizarrek etxean bataz beste 32 gol sartu dute. Alcobendasek berdinketarekin konformatu behar izan zuen (27-27) eta Rocasak 35-30 galdu zuen.
Halere, Bera Bera aurkari latza izan ohi da Porriñorentzat. Azkeneko bost norgehiagoketan, Porriñok ez dizkio 22 gol baino gehiago sartu Bera Berari. Joaneko partidan, 32-19. Gainera Alicia Fernández zentrala galdu du denboraldi osorako, golegile nagusienak esker belaunean lotailu gurutzatua hautsi baizuen lehengo larunbatean. Galiziarrak 11 gol egin zituen Bidebietan, taldearen erdia baino gehiago. Castelldefelsen mina hartu aurretik partidako 8,5 gol zeraman Fernándezek, ligako golegile nagusiena, baina bere taldeak bataz beste 28 gol sartzen ditu. Ondorioz, agerian dago Abel Estévez entrenatzailearen taldeak badituela beste baliabideak erasoan, horien artean Isa Bastero, Orsolya Andrea hugariara eta Maialen Mujika gipuzkoarra lehenengo lerroan; Itxakon jokatu zuen Nekane pibotean edo Sandra Costas eta Lorena Pérez hegaletan. Cacheda gazteak Alicia Fernándezen lekua hartuko du Castelldefelsen bezala, non galizarrak atsedenaldiko 16-11 markagailua iraultzeko zorian izan ziren.
Defentsa lana oinarri Ligako hirugarren erasoari aurre egingo dio Bera Berak. Gainera, Zuazoren aurka erabakiorra izan zen kontraerasoa ateratzen saiatuko da eta eraso geldian konfindantzaz aritu Ligako bosgarren defentsa txarrena baita Porriñorena, bataz beste 27 gol jasotzen baititu; etxean, 25.5.
Autocares Davideko eserlekuetan kokatu ostean, donostiarrek Burgoseko Olmillos de Salsamón herrian bazkalduko dgu, Porriñora 20ak aldera iritsi, ordubete entrenamendua burutu eta 22ak aldera, afaldu. Bihar plana: gosaldu ostean, bideoa, ondoren ibilaldia, 13etan bazkaldu eta 18etan, garaipena helburu bakarra.
Bestetik, euskal ligako kadete eta jubenil taldeak aurreneko aldiz banatuko dira. Hau da, Maria Graciak zuzentzen duen Bera Bera kadete taldeak Basauriko Artunduaga kiroldegian arituko da bertako taldearekin igandean 10,30etan eta Verónica Valverderen Bera Bera jubenil taldea Oñatira abiatuko da Aloña Mendiren aurka jokatzera 12etan igandean bertan.
Azkenik, Mauge Gezalak zuzentzen duen lurralde mailako kadete taldeak Urnietako kiroldegian jokatuko du bertako taldearen aurka igandean 12etan.
Juan Antonio Garaikoetxearen argazkian, Ainara García Txiki.
