22 Urtarrila 2013

Bera Berak lider amaitu du lehenengo aldiz aurreneko itzulia. Bigarren itzuliari (larunbatean BM Porriño 19,30etan), Europako kanporaketa eta Kopari heldu aurretik, Bera Bera Eskubaloiko arduradun Tati Garmendia eta Reyes Carrere entrenatzailea hamahiru partida hauetan egindako lanaz mintzatu dira. “Lehenengo itzulia positiboa izan da, aurreneko aldiz lider gara, Koparako begira berriro zerrendaburu eta liga irabazteko aukerak ditugu” adierazi du Tati Garmendiak Bere ustez, “partida erabakiorrak etxean jokatuko ditugu eta abantaila da guretzat”. Liga hasieran Bera Berak ez zuen arazorik izan onartzeko helburua liga zela. “Taldea dexente berritu arren, egunak pasatu ahala hobeto ari da, Verónica Cuñaren lesio larria gainditu du eta Eli Pinedo eta Eider Rubio jokalarien arazo fisikoak ere bai” azaldu du Garmendiak. Bera Berak pista zailenetan jokatu du, A Guardan eta Elxen hiru puntu utziz. “Elxen galdu genuen baina Rocasari irabazi genion, oso urrats handia dena pista zaila baita, gainera kontutan harturik Eli Pinedo eta Nitsan Dunay erdi lesionaturik zeudela” ohartarazi du jokalari ohiak. Horregatik ez du zalantzan “zaletuen babesa eskatzen, eskubaloia maite duena eta kirola gustoko duenari ere bai, etxean aurkari zuzenak izango baititugu, batez ere etxeko azkeneko bost partidak ikusgarriak izango direlako”. Hori dela eta, kluba “abono berezia prestatzen ari da bost partida horiek ikusteko”, martxoaren 2tik maiatzaren 4rarte izango direnak. Tatiren ustez “liga irabaztea ez da erraza plantilla hain laburra izanda eta lesio larria jasan duena”, horregatik “erregulartasuna mantentzea” izango da “gakoa” partida asko izatea “ez delako berez txarra, lehiatzeak jokalariari onena ateratzen diolako”. Reyes Carrere: “Guztion lana izango da garrantzitsua” Bestetik, Reyes Carrere entrenatzailearen ustez “oso garrantzitsua da behin helburua markaturik, bera betetzea”. “Gure asmoa hori zen, lehenengo itzulian goian egotea” dio. Horrez gain, “puntuak ateratzen ari gara eta Ligako une askotan nahi dugun bezala jokatzen ari gara” aipatzen du. Bere ustez, bigarren itzulia erakargarria izango da, “talde onenak hartuko baititugu”. “Bagenekien etxetik kanpo partida zailak izango genituela, bidean hiru puntu galdu arren, eutsi diegu” gogoratu du. “Liga irabaztea ez da erraza baina bidean gaude” azpimarratzen du. Reyesek uste du gakoa “plantilla kudeatzen” dagoela. “Mundu guztia izango da garrantzitsua, puntu bat bestea baino gehiago ez duelako balio, hori argi eta garbi izan behar dugu” dio konbentziturik. Datozen partida sorta inguruan –liga, Europa, Kopa..- “goian jarraitzeko fin aritu behar gara” ohartarazi du. “Baldintzak direnak dira eta jokatzeko ahalmena duten jokalariak dira gure kezka. Verónica Cuñaren baja arazoa da baina ondo konpontzen ari gara, eragozpenak izango ditugu aurrean” abisatu du. Horregatik, zaletuei “dei berezia” egiten du “guk bakarrik ezin dugulako”. Eta hausnarketarako beta hartu du. “Sei urte daramatzagu goian, Kopak eta Superkopak irabazi ditugu, iaz azpitxapeldunak izan ginen eta aurten gure aurrean irekitzen den egoerak beste urrats batera garamatza. Ezin dugu bakarrik egin, taldeak beheruntz jotzen badu zaletuen babesa oso garrantzitsua izango da eta zedozer lortuz gero fronte askoren lanagatik izango da”. Eta taldea “konbentzituta” ikusten du. “Taldeak hori nahi du, denboraldia hasieratik. Helburu batzuk finkatzen dituzu, zuk duzuna ikusi, besteek dutena eta presioa iristen denean ikusiko dugu aurrera jotzeko gai garen” amaitu du entrenatzaileak.

21 Urtarrila 2013

Pasaiako Portuko Agintaritzako presidente Lucio Hernandok eta Bera Bera Eskubaloiko arduradun Tati Garmendiak sinaturiko lankidetza hitzarmena bitartez, 2012-13 denboraldirako laguntza berretsi du Pasaiako Portuak Donostiako klubarekin. Hori dela eta, Pasaiako Portua marka ikusgai izango da Bera Berak Bidebieta eta Josean Gaska kiroldegietan jokatzen dituen partidatan eta, horrez gain, Bera Bera Eskubaloiak erabiltzen duen karteldegian. Pasaiako Portuko Agintaritza eta Bera Bera Eskubaloiaren arteko lankidetza 2009ko irailean hasi zen. Tati Garmendiak eskertu du “hitzarmena, aurten ilusio handiko helburuak betetzeko laguntza oro delako garrantzitsua”. Egun, eskubaloi ligako lehenengo itzulia amaiturik, donostiarrak líder dira.

21 Urtarrila 2013

Ohorezko mailako taldeko aurpegi gazteenak dira. Esther Arrojeria eta Uxue Ezkurdia dira. Pasa den abuztuaren 1ean, Olatz Ramón eta Nora Azurmendirekin batera lehenengo taldearekin hasi ziren entrenatzen Anoetako miniestadioan. Udan hainbat lagunartekoetan parte hartu zuten baina ligako partidak beste mundu bat dira.
Pasa den larunbatean biek oso pozik amaitu zuten Castro Urdialesen aurkako norgehiagoka. Gol bana eta minutu dexente jokatu zuten. “Bai, oso guztora, pozik” adierazi digu Uxue Ezkurdiak. Bera Berarekin Etxebarrin iaz egin zuen debuta Egiakoak. Aurten Reyes Carrerek hiru deialdietan sartu du: Mar Alicante, Zuazo eta Castro taldeen aurkako partidatan.
Bere lehenengo gola Mar Alicanteri sartu zion ezker hegalean oso jokaldi ederra gauzatuz. Larunbatean 25 minutu izan zituen Matxalen Ziarsolo kapitaina ordezkatzeko. Nagore Arizagak emandako baloia sareetara eraman zuen Uxuek eta horrez gain, penalti bat atera zuen.
Uxuek aitortu du “ez naizela oraindik askatu partidatan”. Askotan entrenatzen dute ohorezko mailako taldearekin eta saiatzen dira partidatan egin behar dena askotan errepikatzen, “baina, jakina, partidatan zailagoa da”.
Gainera lehenengo lerrotik ezker hegalera pasatu da “uste baino hobeto moldatzen ari naiz, halere, oraindik beldur pixka bat dut kontraerasoetara irteten naizenean eta denbora gutxitan gauza asko egin nahi ditut”.
Matxalen eta Eli Pinedo dira Uxueren erreferentziak taldean “postu berean jokatzen dudalako”. “Akaso Matxalenekin gehiago fijatzen naiz, azkarra delako baina Elik daukan kalitatea handia da eta bere mugimenduak adi ikusten ditut” dio Egiakoak.

Esther Arrojeria: “Geroz eta hobeto nago taldean”
Usurbiltarra ere “oso gustora” dago Bera Beran. “Taldean gehiago sartuta nagoela uste dut” izan ere abuztuan “zerotik hasi nintzen, apenas ezagutzen nituen eta ilusio handiz ari naiz entrenatzen” dio Estherrek.
Verónica Cuñaren lesiotik hona Esther Arrojeria finkoa da Reyes Carrere entrenatzailearen deialdian. “Ondo, gustora, ohorezko maila ezberdina da baina ondo dago aldagela bizi, txarlak eta horietakoak” azaldu du, taldean “geroz eta hobeto” sentitzen dena.
Larunbatean defentsan baloi bat lapurtu eta zuzenean joan zen Castro Urdialesen atea zulatzea. Debutean, halere, “hotz negoen” aitortzen du usurbiltarra. Valentziaren aurkako partidan Gaskan, ETBk eskaini zuena. Azkeneneko bost minutuak jokatu zituen, Castroren aurka, aldiz, hamar minutu izan zituen.
Estherrek ere “nire postuan aritzen dena dut eredu”, kasu honetan Eider Rubio. “Gainera asko laguntzen dit hasiera hasieratik, bere atzetik joaten nintzen ariketak egiten, zer moduz nengoen galdetzen zidan eta asko ikasi dut” dio hasperen eginez.
Uxuek eta Estherrek ahal dutenean bat egiten dute Egia Bera Beran senior mailako taldean. “Oso ondo goaz, puntu bakarra galdu dugu eta lehenengo fase hau líder bukatu nahi dugu” dio Uxuek.
Era berean, biek Unibertsitatean ikasten dute. Uxuek Enpresa ikasketak eta Estherrek, Erizaintza, Nagore Arizagak bezala.

19 Urtarrila 2013

Bera Berak Castro Urdiales hartu du gaur Bidebietan, ligako azkena izan arren partida serioa egin du, batez ere defentsan, danborrak geroko utziz. Bere alde horrela erabaki zuen norgehiagoka, ondorioz, ohorezko mailan aritzen denetik aurreneko aldiz lidergoan dira donostiarriak lehenengo itzulia amaituta.
Reyes Carrerek 6-0 defentsa planteatu du Elorza eta Ederra erdian kokatuz. Castro Urdiales pibotearekin jokatu nahi zuen baina ez du asmatu. Halere, kantabriaren baloi galduak ez ditu ondo aprobetxatu Bera Berak (min 9, 4-2) aldea nabariago izango zelako.
Eli Pinedoren bajaz aparte, Bera Berak atsedena eman die Zoqbi eta Eider Rubiori. Horrela, Patri Elorza eta Nagore Arizagak partida osoa jokatu dute, Alba Menéndez bezala partida amaieran erasoan atsedena hartu duena.
Bera Berak nahikoa zuen defensa erdia ixten eta erasoan asmatzen Castro atzean uzteko. Horrela markagailuak atsedenaldian 16-9 adierazte zuen eta eskerrak Patricia Aisa atezainari, oso geldiketa onak egin baititu.
Bigarren zatian, Bera Berak erasoan ez du asmatu Castrok kontraerasoak gauzatu dituen arte, 60 minutuan jokatu dituen Yamiley atezainaren geldiketak baliatuz.
Partida amaitzeko 25 minutu falta zirela, Reyesek Uxue Ezkurdia atera du Matxalen Ziarsolori atsedena emateko. Kapitainak bi partida oso osorik jokatu zituen, Zuazo eta Rocasaren aurka.
Bera Beraren ibilibidea berdina zen. Patri Elorzak taldekide ohiekin ez du kupidarik izan eta Bera Berako lehenengo lerroak 15 gol sartu ditu. Hamar minutu falta zirela Esther Arrojeria atera da pistara. Egia Bera Bera senior mailako jokalariek gol bana sartzeko aukera izan dute. Dunayk, badaezpada, ez du jokatu.
Ondorioz, Bera Berak… beti pozez, beti alai… partida bukaeran abestu du. Poza handia da lehenengo itzuli amaieran líder dagoelako eta berriro ere Kopan zerrendaburu. Datorren larunbatean, BM Porriño izango da Bidebietan (19etan).

Fitxa: Bera Bera 31, Castro Urdiales 16
Bera Bera 31 (16+15): Yamiley, Altuna (3),Arizaga (6, 1p), Menéndez (3), Elorza (6, 2p), Ederra (1) eta Ziarsolo (4, 1p) –titular- Núñez (1), Castro (5), Ezkurdia (1) eta Arrojeria (1).
Castro Urdiales 16 (9+7): Aisa, Hernando, Cobo (5), Gil (1), García (3), Costales (1) eta Vilella (1)–titular- Andrea Fernández (2), Haya (1), López (2) eta Santamaria (o.a.).
Epaileak: Carla Diz eta Ana Correa (Galizarrak)
Kanporatuak: Ziarsolo etas Arizaga Bera Beratik eta Vilella eta Costales Castro Urdialesetik.
Partziialak: 3-1, 5-2, 7-4, 10-5, 14-8, 16-9 -atsedenaldian-17-10, 19-12, 20-12, 24-14, 26-14 y 31-16