14 Otsaila 2013

Bera Bera Eskubaloiak Gaskan hasi zuen ibilbidearekin jarraitu du Lizarrerian eta lehenengo minututik Itxakori mezu bat bidali dio, ez zuen ajerik eta ahalik eta azkarren tartea zabaldu nahi zuen markagailuan. 17-32 zalantzarik ez du adierazten eta Bera Bera sailkapen burua da. Izan ere, Maestrok zaintzen zuen sarean amaitu dira Bera Berak bidalitako lehenengo baloiak. Itxakok penaltiz eusten zion (10. Min. 4-6) baina ezin zuen donostiarren 5-1 defentsarekin. Lehenengo lerroak Núñez, Ederra eta Elorzarekin topo egiten zuen, jaurtiketak blokeatuz eta Yamileyren urrutzen zituen. Ederrak sartutako bi golek bidea zabaldu dute eta ondoren Pinedo eta MAtxalen Ziarsoloren kontraerasoak iritsi dira (12. min. 5-12) atsedenaldirarte jarraitu direnak (9-16). Eta ez dira gelditu ondoren. Bigarren zatian donostiarren lehenengo golak hórrela iritsi baitira, kontraerasoetara ZIarsolo, Pinedo eta Altunak gauzatuak, 20. min 11-19 ezarriz. Ondoren, María Núñezi txartel gorria atera diote baina Bera Bera berdin jarraitu du, defentsa sendoa, atean ondo eta kontraeraso zitala. Garaipen honekin, jardunaldiari amaiera jarri dio Bera Berak lidergoan, Elche Mustang taldeak baino puntu bat gehiago duela. Larunbatean beste bidai laburra, Etxebarrira non Kukullaga izango da zain (20etan). Bera Berako jokalariak Itxaso Egañari oparitu diote garaipena, izan ere, Bera Berako jokalari ohiaren Miguel aita zendu baitzen. Fitxa Itxako 17, Bera Bera 32 Itxako Navarra 17 (9+8): Maestro, Sifuentes (1), Vera do Carno (4), Arrechea, Flores (5), Varea (1) eta Barrios (2) –titularra- Jiménez (1), Tornero (2), Urdiain (1), Goñi eta Feutchmann. Bera Bera 32 (16+16): Yamiley, Castro (2), Rubio (2, 1p), Menéndez (2), Ederra (5), Elorza (2) eta Pinedo(7) –titular- Núñez (1), Altuna (2), Dunay, Ziarsolo (8), Zoqbi (p.s.) eta Arizaga (1). Epaileak: Ion Bustamante (Nafarroa) eta Javier Álvarez (EAE) Kanporaketak: Pinedo, Núñez, Dunay, Rubio; Núñez, gorria (44 min.) eta Arrechea eta Feutchmann (2) Itxakotik.. Partzialak: 3-3, 4-6, 4-8, 5-11, 6-16, 9-16 –atsedenaldia- 9-18, 11-20, 13-22, 14-24, 16-29 eta 17-32.

14 Otsaila 2013

Lehengo igandean Gaska kiroldegian Bera Berak 12 golez azpitik zegoen kanporaketa bat irauli egin zuen partidaren atsedenaldian, Imanol Reformas S.L. emandako bizikleta baten zozketa burutu zen.

Txartela sariduna 569 izan zen baina ez zen inor agertu, ondorioz, klubak txartelak begiratzeko deia egiten du. Amaia Alberro kadete mailako jokalariak saldu zuen. Bulegoko telefonoa 943458166 da.

13 Otsaila 2013

Bera Bera Eskubaloia eta Itxako izan ziren igandean ezusteko protagonistak Europako kanporaketetan lorturiko iraulketak medio. Donostiarrek 12 gol eta nafarrek, 13 Turkian. Egutegiak elkartu ditu gaur Lizarrerian (20etan) eta liga bezalako lehiaketa bati ondoen moldatzen dena abantail handia izango du. Otsaileko hilabetea hirutan zatitu egin zen donostiarrentzat, izan ere, hiru lehiaketa ezberdinei heldu behar izan diete. Aurrena Europari dagokiona, joaneko partida ostean ustebakean ondo atera dena. Bigarren zatiari gaur helduko dio Bera Berak, Lizarrerin helburu nagusiena dena, Liga, alegia, larunbatean Etxebarrin Kukullagaren aurka jarraipena izango dena (20etan). Eta hirugarrena Kopa, datorren astean, otsailaren 21etik 24ra bitartean Galizan. Bai Itxakok, bai Bera Berak puntuak behar dituzte gaur. Lizarrako taldeak jaitsiera postuetatik irteteko eta donostiarrak lidergoa berreskuratzeko, Barakaldon asko sufritu zuen Elche Mustang taldearen eskueta egun. Era berean, beste pizgarria du partidak, izan ere, Itxako eta Bera Beraren arteko lehiak biziak izan dira azkeneko urtetan eta gaurkoa ere bai. Sailkapenari so eginez eta irailean gertaturikoari erreperatuz norbaitek pentsa dezake partida aldez aurretik erabakita dagoela. Oker legoke. Bera Berak ligan sendo dagoela erakutsi du, hiru puntu bestetik ez baititu utzi bidean. Itxako, berriz, Chema Vives entrenatzailea iritsi zenetik beste bat da. Ligan azkeneko lau partidetatik hiru irabazi ditu eta nafarrak jaitsiera postuetatik irteteko zorian dira. Gainera Inga Feuchtmann ezker hegaleko jokalaria fitxatu du, bi gol sartu zituen txiletarrak Alcobendasen. Eider Rubioren zalantzarekin egingo du bidaia Bera Berak. Donostiarrak ez zuen igandean Vistal Laczpol Gdyniaren aurka jokatu, bai ordean Nitsan Dunay orkatilean egindako bihurritua sendatuta.

12 Otsaila 2013

Gaur goizean EHFko Vienako egoitzan buruturiko zozketaren arabera, Bera Bera Eskubaloiari azkeneko bi denboraldietan Alemaniako txapeldun sortatu den Thüringer HC taldea egokitu zaio Cup Winners Cupeko final-laurdenetan. Joaneko partida Donostian izango da martxoaren 9 edo 10ean eta itzulikoa, 16 edo 17an.

Champions Leagueko Multzoen Fasetik dator Thüringer. Donostiarrek Viborgen burutu zen Championseko fasea gainditu izan balute alemaniarrekin bat egingo lukete. Thüringer taldeak daniarrei irabazi zien bi partidak (34-30 eta 26-29) eta egungo Europako txapeldun Buducnost (24-20). Halere, sei puntu hauek ez ziren nahikoak izan Main Round delakoa jokatu ahal izateko, ondorioz, Cup Winners Cupen aritzen da ordutik eta Mazedoniako Metalurg aise gainditu zuen (61-35) final-zortzirenetan.

Europan ia eskarmenturik izan ez arren “oso talde sendoa da” ohartarazi du Bera Bera Eskubaloiko arduradun Tati Garmendiak. Buxtehuder taldeari birritan irabazi dio Alemaniako txapelketa, 2010-11 denboraldian etxetik kanpo sartutako golei esker eta iaz gol bakar batek eman zion txapela. 2011-12an Championsen aritu zen puntu bakarra lortuz eta 2009an Challenge Cupeko finala jokatu zuen.

Halere, Tati Garmendiaren esanetan “eskuin hegalean oso jokalari onak ditu Katrin Engel austriarra eta Ana Gros esloveniarra eta Augustesen Danimarkako jokalari internazionala albokoan”. Azpimarratzekoa ere “Anja Althaus pibotea, Viborgen denboraldi asko eman dituena eta Tomasevic, Bera Berako atezain ohia”.

Ligan, Thüringer HC hirugarrena da partida bat gutxiagorekin, Leipzig hiru puntutara du eta Buxtehuder liderra laura, ligako aurreneko fasea amaitzeko sei jardunaldi falta direnean.

Final-laurdenak honako partidak osatzen dituzte: Vaci - Issy Paris; Rostov - Leipzig eta Dinamo Volgograd - Hypo. Azken neurketa honen irabazleak hartuko luke Bera Berak finalerdietan kanporaketa gaindituz gero.

Ligan eragina

Kanporaketa honek Bera Beraren ibilbidea ligan aldatuko du, 18. eta 19. jardunaldiak, alegia. Bera Berak Alacantera egin behar duen bidaia aurreratu beharko du eta erabakiorra izan daitekeen norgehiagoka Alemaniarren aurkako partiden artean izango da, donostiarrek Elche Mustang hartuko baitute orduan.