Aste bukaera hau urteko azkena izango da ligako konpetizioari dagokionez Bera Beraren harrobiko taldeentzat, eta euren partiduak irabazi egin nahi dituzte opor txiki batzuetara joan baino lehen.
Larunbat goizean infantilek jokatuko dute. Lehenengo B taldeak egingo du. Sailkapenean jada bigarrenak dira eta lidergora iritsi nahiko dute Urnietako B-ri irabazita Bidebietan 10:30etan. A taldea bestalde, Urnietako Udal Kiroldegian 12:30etan jokatuko du Urnietako Aren kontra.
Kadeteek larunbatean jokatuko dute Bidebietan, 18:00etan konkretuki. Pulpo izango du arerio, mailako talderik onenetakoa, beraz, partidu serioa egin beharko dute garaipena lortzeko.
Lehia hau amaitutakoan, 20:00etan Bidebietako kantxara seniorrak aterako dira. Jarrilleras taldea izango da bisitaria, bigarren sailkatua. Honenbestez, aukera ezinhobea izango dute sailkapenean hauek harrapatzeko.
Bukatzeko, jubenilek larunbatean 16:00etan Bartolo jatetxearen aurka arituko dira Zarautzen, sailkapenean bere atzean dagoen taldea. Irabazi ezkero, txapeldun izateko pauso ikaragarria emango lukete.
Hurrengo igandean, abenduak 19, Bera Beraren harrobiko talde guztiak Gasteiza joango dira Sansomendi Txapelketako hainbat triangular jokatzeko, bakoitza bere mailean.
Infantilak izango dira lehenak jokatzen, 10:00etatik aurrera. Euren arerioak Gasteizeko Mendebaldea eta Kantabriako Salesianos Dosa izango dira. Partidu bakoitzak 20 minutu iraungo ditu.
Kadeteenak 25eko iraupena izango dute eta arerioak Gasteizeko Alaves eta Kantabriako Salesianos Dosa izango dira.
Jubenilek eta seniorrek 30 minututako lehiak izango dituzte. Lehenengoek bertako Eharialdea eta Kantabriako Dosa Universidad izango ditu areriotzat, eta seniorrek Gasteizeko IES construccion eta Kantabriako Dosa Universidad.
Aurreko deialdian gertatu bezala, oraingoan ere Bera Berako Nora Azurmendi (kadetea) eta Maitane Etxeberria (infantila) jokalariak Euskadiko selekzioarek deitu ditu, Gasteizen abenduaren 27tik 30era egingo den kontzentrazioan egoteko.
Ia ziurtasunez esan daiteke, hauek izango direla Espainiako Txapelketa jokatuko duten jokalariak. Gogoratu kadeteen eta infantilen txapelketa urtarrilean izango dela Caceresen. Zorionak neskak eta horrela jarraitu!
Hurrengo ostiralean, abenduak 17, Anoetako estadioan dagoen Kirol Etxean 12:00etan Bera Bera eskubaloi taldeak 2011 urterako egutegia aurkeztuko du, besteak beste. Oso lan berezia da, non lehen taldeko jokalariak protagonistak diren, euren sentsualitatea erakutsiz.
Egutegi hau Klubak irudia eta publizitatearengatik egin duen apustuaren erakusgarria da. Bera Beraren erronka da hurrengo urterako. Egutegi honetaz gain, web orrialde berri batean ari gara lanean, laster argitaratuko dena. Gainera irudi katalogo bat eta merchandising produktu ugari egingo dira.
Honetaz guztiaz hitz egiteko, komunikabideei deialdia egingo zaie Kirol Etxean egingo den prentsaurrekora etor daitezen. Bertan Klubaren estrategiaren alderdi guztiak azalduko dira. Gainera bertan egongo dira, Pedro Usabiaga, egutegiko argazkiak egin dituena, Jose Manuel Monje, zuzendari artistikoa eta Klubaren irudiaren arduraduna, eta baita Zulai Agirre ere, taldeko kapitaina.
Nahiz eta emakumezkoen eskubaloiaren munduan erreferentzia izan, Klubak bere lorpenek duten ohiartzuna handitu egin nahi, proiektua ezagutzera eman nahi du, alegia. Bera Beraren zuzendaritzak egunero egiten duten lana ezagutzera ematea ezinbestekotzat jokatzen du, alderdi sozialean adierazgarriagoa izateko asmoarekin. Hedabideetara eta gizartera indar handiagoarekin iristeko, egutegi berezi hau egin da.
Pedro Usabiaga operazioen zuzendari bezala izanik, gure neskek berarentzat paratu zuten euren alderdi femeninoena eta sentsualena erakutsiz. Antzeko beste iniziatiba batzuek ez bezala, neskak ez dira biluzik aterako. Irudi sugerenteak dira, eta euren helburua goi mailako kirolarien atzean emakume eder eta erakargarriak daudela erakustea da.
Hauek dira hilabete bakoitzeko protagonistak:
Urtarrilla Wendy Obein
Otsaila Libe Altuna eta Alba Menendez
Martxoa Nagore Arizaga
Apirila Veronica Cuña
Maiatza Matxalen Ziarsolo
Ekaina Eider Rubio
Uztaila Dara Carvalho
Abuztua Katarina Tomasevic
Iraila Anita Campa
Urria Beatriz Fernandez
Azaroa Zulai Agirre
Abendua Anna Punko
Atzo Montenegrorekin 20-22 galdu ostean, Espainiako selekzioa Norbegian eta Danimarkan ospatzen ari den Europako txapelketan domina lortzeko borrokatik kanpo geratu zen. Beatriz Fernandezek titular jokatu zuen eta gol bat sartu zuen.
Egia esan Espainiako selekzioak oso zaila zuen, lehen fasetik punturik gabe pasa ostean. Lehen fase horretan Tomasevicen Serbia jada kaleratua izan zen, eta orain Espainia da bide horretan dihoana, nahiz eta oraindik Errusia (gaur) eta Kroaziaren aurka jokatu behar duen.
Momentu honetan 1 Taldeko azken postuan dago, punturik gabe, eta bere hurrengo bi arerioak zailak ez diren arren, aurreneko sailkatuek duten abantaila oso handia da. Horrela, Bera Beraren jokalariek ezin izango dute Europako txapeldun izan.
