03 Urria 2013

Eli Pinedo, Patri Elorza eta Ana Martínez jokalariek ez dute atsedenik izango urrian. Urriaren 20ean Gaskan Larvik taldearen aurka jokatu ostean, Champions Leagueko hirugarren jardunaldian, hurrengo egunean, astelehenean, Leonera joan beharko dute 2014ko Eurokopan parte hartzeko fasea prestatzera. Aste horretan ez dago ez Champions ez Ligarik eta donostiarren hurrengo partida urriaren 31an Castelldefelsen izango da. Ondorioz, Pinedo, Elorza eta Ana Martínezek urrian bederatzi partida jokatuko dituzte (atzo lehenengoa), Bera Berarekin zazpi –Championseko hiru- eta Espainiarekin, bi. 2014ko abenduan Hungaria eta Kroaziara joan ahal izateko, Dueñasen selekzioak Holanda, Turkia eta Italia gainditu beharko ditu. Horrela, urriaren 24ean Leongo Kiroldegian 20etan, Espainiak Turkia hartuko du eta urriaren 26an Pescaran Italia izango da aurkaria. Hurrengo jardunaldian datorren urteko martxoan izango da. Espainiako Ligako Silvia Navarro (Rocasa) eta Cristina González (Cleba León) atezainak eta Raquel Caño (Cleba León) sartu ditu Dueñasek. Bera Bera da Frantziako Fleury taldearekin batera -Bea Fernández, Marta López eta Marta Mangué-, Espainiako selekzioara jokalari gehien bidaltzen dituen taldea.

02 Urria 2013

Lehengo larunbatean Barakaldora joan ziren 14 jokalariekin egingo dio gaur aurre Bidebietan Bera Berak Porriñori (19etan, Sebastián Fernández eta Alberto Murillo, Andaluzia). Hau da, María Akuña atezain gazteak Yamiley Rodríguezen lekua hartuko du, izan ere, giharretako minez dago kanariarra.
Ligako laugarren jardunaldia partida aurreratu da Bera Berak Championseko ligaxkan Mazedoniako txapeldun Vardar taldearen aurka debuta egingo duelako (igandean, 12,15etan, Gaskan). Donostiarrek, halere, ez dute hanka-sartzerik nahi bi puntuen garrantziaz jabeturik, Liga eskuratzeko garrantzitsuak eta lidergoan jarraitzeko ezinbestekoak.
Estela Doiro galdu duen Porriñon Alicia Fernandez da egun Ligako golegile nagusiena, partidako 10 gol sartu dituena.
Bera Berak defentsako lana berretsiko du, izan ere, Ligako gol gutxien jaso duen taldea da –partidako, 19- eta ez bakarrik emakumeezkoen ligan baizik eta gizonezkoen Asobal eta Zilarrezko mailakoetan ere bai.

02 Urria 2013

Gaur goizean, Barceló Costa Vasca hotelean, emakumeen eskubaloiko Champions League aurkeztu da, Europako maila goreneko txapelketan egingo du debuta Bera Berak. Igandean izango da, urriaren 6an, 12,15etan Josean Gasca Kiroldegian eta aurkaria, Mazedoniako Vardar txapelduna, oso talde indartsua.
Aurkezpenean izan dira Bera Bera RTko presidente Fernando Diez Mintegi; Gipuzkoako foru Aldundiko Kiroletako zuzendari Asier Sarriegi eta Eusko Jaurlaritzako Kiroletako Zuzendari Jon Redondo.
Fernando Diez Mintegiren ustez “erronka oso zaila da baina ilusioz beterikoa” eta klubak “sari bezala ulertu du, guretzako Liga irabaztea lorpen handia da baina Champions Leaguen parte hartzea eta Europako talde onenak ikustea askotan emango ez den gauza da”.
Bere ustez, “taldeko jokalari gazteentzeko erreferentzia izan daiteke txapelketa honetan aritzea, emakume kirolariek gehien maite duten kirolean ibilibidea betetzeko aukera dutelakoan”. Presidenteak azpimarratu du “taldeak laguntza behar du, instituzioen babesa badugu, horregatik gaude hemen eta jakin badakite saiatuko garalea eta entitate, enpresen eta afizionatuen ekarpena jasotzen jarraituko dugu, Bera Beraren proiektuak fruituak ematen jarrai dezan”.
Azkenik, “kolaboratzaileen ekarpena” eskertzeaz gain, komunikabideei dei egin die jokatu behar dugun Championsari oihartzuna emateko Gasca igandean betetze aldera. Donostia, Champions hiria da.
Bestetik, Gipuzkoako foru Aldundiko Kiroletako zuzendari Asier Sarriegi azpimarratu du “Bera Berak egiten duen lana, eskola kirolari eta harrobiari begira egokia eta horregatik jasotzen du Foru Aldundiaren babesa”.
Eusko Jaurlaritzako Kiroletako Zuzendari Jon Redondo Bera Bera “zoriondu du, lortutako garaikurrak, Basque Teamenko partaide izateagatik eta gizarteak behar dituzten baloreak zabaltzen dituelako”. Era berean “enpresei dei” egiten die “Bera Bera bezalako taldeak babesteko” eta zalegoa animatu du “Gascara igandean hurbiltzeko”.

30 Iraila 2013

Barakaldoko Lasesarre kiroldegian markagailuak 14-19 adierazten zuen 44 minutuan, Ana Martinezen barneraketa bat medio eta itxuran Bera Berak partida kontrolpean zuela zirudien. Halere, ez zen horrela izan, Imanol Álvarezek hutsarte batekin norgehiagoka gelditu behar izan zuen 49. minutuan baina sei minutuetan Zuazok 4-0 partziala lortu zuen (18-19). Orduan Maitane Etxeberriak Adriana Castro ordezkatu zuen eskuin albokoan. Ohorezko mailan debuta egin zuen jokalariak 16 urte eta 255 egun zituela eta bikain aritu zen bere golak 18-20 suposatu zuelako. Oihane Gilen beste gol batek berriro gol batera kokatu zuen Zuazo baina Ana Martínezen -91an jaioa- unea iritsi zen, jarraian hiru gol sartu baitzituen (20-23) bata bestea hobetuz. Oso garrantzitsuak izan ziren Ana Tempranoren geldiketak Ainhoa Hernández pibotearen eta Tania Yañez penaltiz jaurtikitutako baloiak. 1991ko uztako beste jokalari batek, Alba Menéndezek 20-24 jarri zuen eta partida 97koak itxi zuen, Maitane Etxeberriak. 90. hamarkada sartzen ari da pixkanaka pixkanaka Bera Beraren plantillan. Aipatutakoaz gain, pistan aritu dira Adriana Castro (90ean jaioa), Nitsan Dunay (91ean) eta Nagore Arizaga (92an) eta eseslekuan, Esther Arrojeria (94ean) eta María Akuña atezaina (95ean) Yamiley ordezkatu zuena larunbatean.