Bera Bera - Berriak

14 Abendua 2011

Gaurko gaua (23tan, teledeporte) berezia izango da Brasilgo Mundialean jarraitzen duten Bera Bera Eskubaloi taldeko jokalarientzat. Gaur, elkarren aurka arituko dira gainera. Eli Pinedo, Espainiarekin eta Dara Carvalho Brasilekin final laurdenetan elkartuko dira finalerdiak helburu. Antolatzailea denez, Brasilek publiko osoa alde izango du baina, era berean, partida irabazteko presio handiagoa nabarituko dute jokalariek. Dara Carvalho kapitainak hórrela adierazi zuen Mundiala hasi aurretik, “Brasilek lortu duen sailkapen hoberena zazpigarrena izan da, halere, etxean jokatzen dugu eta urrea nahi dugu”. Bestalde, Espainia lasaitasunez arituko da lehenengo helburua lortu duelako, preolinpikoa jokatzeko txartela, alegia. Hainbat jokalari min hartuta izan arren, Jorge Dueñasen selekzioak ez dizkio gauzak errazak jarriko Brasili. Eta Eli Pinedo zutabe nagusi bat izango da. Bera Bera Eskubaloi taldeko hegalak minutu gehien jokatu duen jokalaria da, 3 ordu eta 47 minutu guztira, bataz beste, partidako ia 38 minutu. Horrez gain, golegile nagusiena da, %71eko portzentajearekin 25 gol sartu dituelarik –Montenegroren aurkako finalzortzirenetan, zazpi-. Dara Carvalho partidako 28 minutu egon da pistan, zazpi gol sartu ditu eta bere ekarpen nagusiena defentsan eman du, besteak beste, sei baloi blokeaturik. Mundiala hasi aurretik, Brasilek 28-24 irabazi zion Espainiari Sao Paolon jokaturiko lagunartekoa. Bera Bera Eskubaloi taldeko facebookean bi jokalariak mezuak jarri dituzte, batez ere, elkarrekin jokatzea nahiago dutela esateko. Horrela, gauerdian jakingo dugu bietako nork lortzen duen finalerdierako txartela. @BalonmaBeraBera twitterrak horren berri emango du. Argentinak Australia gainditu zuen Mundialeko azken postua saihestu zuen Antonella Menaren Argentinak Australiari aise irabazita (30-12). Halere, oso esperientzia ona izan da Bera Bera Eskubaloi taldeko Menarentzat, izan ere, asko jokatu du piboteak, bataz beste, partidako 55,5 minutu eta %73ko portzentajearekin zortzi gol sartu ditu.

14 Abendua 2011

Gipuzkoa Poliklinikan Bera Bera Eskubaloi taldeko Anna Punko jokalariari ebakuntza egin diote gaur goizean, ezker orkatilaren kapoaldeko ligamentuaren haustura sendatze aldera.

Lehengo ostiralean, eskuin laterala errusiarrak bihurritu zuen orkatila gaizki erorikoa kausa eta pasa den astelehenean kapoaldeko ligamentuaren haustura konfirmatu egin zuten. Horrela, gaur egin diote ebakuntza Anna Punkori, hiruzpalau astez hankan igeltsua eraman beharko du eta, dirudienez, gutxienez bajan bi hilabete emango ditu.

Ondorioz, Bera Berak Punkorik gabe berrabiaraziko du liga urtarrilean eta, ziur aski, Lada Togliatti errusiarraren aurkako EHF Kopako kanporaketan ere eskuin laterala baja izango da.

13 Abendua 2011

Pasa den ostiralean gaizki erori batek Anna Punkoren ezker txorkatilak lesio larria sufritu zuen, atzo konfirmaturik gelditu zena, kapoaldeko ligamentuaren hostura, hain zuen. Gipuzkoa Poliklinikan gaur goizean egin dizkioten frogen ostean, Bera Berako eskuin hegalari bihar egingo diote ebakuntza eta, itxuran, errekupezioak bi hilabete iraungo du.

Horrela, errusiarrak urtarrilean –hilan 7an bueltatuko da liga- jokatuko diren partidak galduko ditu eta oso aukera gutxi ditu EHFko kanporaketari dagokion Lada Togliatti errusiarraren aurkako joaneko partida jokatzeko.

Ezbehar hau izan arren, Bera Bera Eskubaloiak prestakuntza prozesuarekin jarraitzen du eta gaur arratsaldean lagunarteko berri bat jokatuko du, Bidebieta 6,30etan, Bizkaiko Kukullaga taldearen aurka. Reyes Carrere entrenatzailearen asmoa da ostiralean beste partida bat izatea eta, horrez gain, astelehenean, abenduak 19, Mios Biganos talde frantziarraren aurka neurtuko da Bera Bera eta gabonetako oporraldiak hartu baino lehen, asteartean, Egia Bera Bera izango da arerioa.

12 Abendua 2011

Pasa den asteburuan Bera Bera Eskubaloiko harrobiko taldeek izan dituzten emaitzen artean azpimarratzekoak dira Bera Bera Egia jubenil eta Bera Bera Egia kadete 2 taldeek etxetik kanpo lortutako garaipenak, sailkapeneko gailurrean jarraitzen dutelarik.

Bestalde, Bera Bera Egia kadete 1 taldeak Legazpin galdu zuen (26-19) gaur egun sailkapenean bigarrena den Aluminios Aluminiosen aurka, larunbatean Gascan (16etan) Bera Bera Egia kadete 2 taldearen arerioa izango dena, hain zuzen. Kadeteek aise irabazi zion CDB Leizarani (22-36) larunbatean Andoainen.

Partida gaizki hasi arren eta Madrilen Euskadirekin ziren Nora Asurmendi eta Olatz Ramon jokalarien bajak zituela, jubenil taldeak erreakzionatzeko grina izan zuen eta Zarauzko Aiala 18-25 gainditu zuen. Larunbatean, arratsaldeko 5,45etan Bidebietan, sailkapenean lider direnen arteko lehia: Bera Bera Egia jubenil eta Ereintza Aguaplast taldeak aurrez aurre, alegia.

12 Abendua 2011

Bera Bera Eskubaloia eta Lagun Aro Gipuzkoa Basket klub gipuzkoarrak gaur iluntzean Donostiako Aquariumean aurkeztu dute 2012ko egutegia, gizarteari kirolaren balioak zabaltzeko helburuarekin bi taldeetako jokalarien irudiekin osatu dena.

+Emotion lemapean, egutegiak tolerantzia, lankidetza, kemena, konpromisoa bezalako baloreak zabaltzen ditu, hamabi guztira, Pedro Usabiaga argazkilari donostiarrak egindako 24 irudi artistikoen bidez. Kirol adierazpen hauek bizitzan ere erroturik daude, hala nola, iritzi edo jarrera ezbedinak onartzea, nork bere burua gainditzea, etsipenari aurre egin, helburu bat lortzeko irrika edo proiektu batean inplikazioa.

Aquariumeko auditoriumean burutu den ekitaldean bi taldeetako jokalariak, entrenatzaileak, zuzendariak eta babesleak izan dira. Bera Bera Eskubaloia eta Lagun Aro Gipuzkoa Basket taldeen arteko lankidetza aitzindari honek kirola erabili du gizarteari balore positiboak zabaltze aldera. Hori da, hain zuzen, bi presidenteek azpimarratu dutena, Bera Beraren eskubaloi sekzioko presidente Amaia Ramirezek eta Lagun Aro GBC taldeko presidente Gorka Ramonedak, alegia.

Horrela, bihartik aurrera, abenduak 13 asteartea, egutegia 10 eurotan salgai izango da: bi taldeetako bulegoetan –Bidebietan eta Anoetan-, partida egunetan (asteartea, abenduak 13, 19etan Bera Bera-Kukullaga lagunarteakoan eta larunbatean, abenduak 17, iluntzeko 8etan Lagun Aro GBC – Fuenlabrada norgehiagokan Ilumben) eta, horrez gain, Erreka tabernan, Bidebietako estankoan, Ulialde liburudendan –Galtzara nagusia, 30- eta Kevin Sport dendan–Gipuzkoa plaza-. Egutegia nola egin zen