13 Maiatza 2012

Bera Bera Eskubaloiak eskertu die zaletuei, kolaboratzaileei, babesleei, entitate, instituzio eta talde osoari denboraldi osoan zehar egindako esfortzua, historian aurreneko aldiz ligan azpitxapeldun gelditzea lortu baitu.

Partida hasi aurretik, jokalariek ‘zu ere Champions zara’ lemapean kamisetak jantzi dituzte jaso duten babesa eskertze aldera. Era berean, Bera Bera Eskubaloiko presidente Amaia Ramírezek oroigarria eman die Bera Berari laguntzen dioten babesleei, entitate eta instituzioei. Ikus argazkiak

Eta Ucam Murcia taldearen aurkako azkeneko partidan –ETB KSATek zuzenean eskaini duena- jokalari gazteei minutuak emateko balio izan du, Alba Menéndez eta Nagore Arizaga, esate baterako eta Dara Carvalho pibotea zigortuta zegoenez Olatz Ramón jubenilari aukera eman dio debutatzeko Reyes Carrerek.

Aurreneko hamar minutuak Ucam Murciarenak izan dira (2-5) aurreratu delarik, Reyes Carrerek hutsartea eskatu duen arte. Azkeneko 20 minutuetan donostiarrek 12-3 partziala sartu diote Murciari eta partida erabaki dute. Bigarren zatian, jokua ez da aldatu eta Bera Berak hamargarren partida jarraian irabazteaz gain marka ezarri du garaipenak eta puntuak lortzen: 45 puntu eta 22, alegia.

Partida amaieran jokalariek oroigarriak jaso dituzte, datorren urtean jarraituko ez duten Carvalho, Punko, Campa, Berta eta Bea Fernándezek opari berezia izan dute eta Amaia Ramírez Bera Bera Eskubaloiko presidenteak ere bai.

Pista erdian ohorezko mailari hurbildu zaio harrobia eta guztiek ‘Gora Bera Bera’ aldarrikatu dute.

Fitxa:

Bera Bera 32( 15+17): Zoqbi, Altuna (2), Punko (2), Cuña (1), Rubio (2), Bea Fernández (4) y Ziarsolo (3) –titularra- Ménendez (5), Arizaga (2), Berta (4), Pinedo (5), Campa (2) eta Olatz Ramón.

Ucam Murcia 20 (9+11): Temprano, Stefanova (2), Navarro, Fernández (1), Roda (1), González (4), Laura (8), Valiente (1), Verdú (1) Martínez eta Pérez (o.a.).

Epaileak: Amaia Barrena eta Mónica García (Euskaldunak) Kanporaketak: Punko, Menéndez, Campa eta Bea Fernández Bera Beratik eta Roda eta Ucam Murciatik.

Partzialak: 1-2, 3-6, 7-6, 8-7, 14-7, 15-9 –atsedenaldia- 17-11, 20-12, 23-15, 26-16, 29-18 y 32-20.

Gertaerak: Bera Berako sortzaile eta presidente-orde Kote Olaizolaren hilketa dela eta, minutuko isilunea gorde da partida aurretik. Era beran, babesleak eta instituzioek oroigarriak jaso dituzte, besteak beste izan dira, Juan Karlos Izagirre, Donostiako alkate; Josu Ruiz, kiroletako zinegotzia; Ikerne Badiola, Kultura, Gazteria eta Kiroletako foru diputatu; Ignacio García, BAT Basque Team Fundazioko gerentea eta Lucio Hernando Pasaiko Portuko presidentea.

12 Maiatza 2012

Gaur goizaldean Kote Olaizola utzi gaitu bihotzekoak emanda. Lerro hauen bitartez familiari besarkada handi bat bidali nahi diogu. Bera Beraren sortzailea, Kote zutabe garrantzitsua da kluban eta eskubaloian, ondorioz, gure bihotzetan izango da beti. Hori dela eta, minutu bateko isilunea gordeko dugu gaur arratsaldean (19etan, Bidebietan) Bera Bera Eskubaloia eta Ucam Murcia taldeen arteko partida hasieran.

11 Maiatza 2012

Lema honekin Bera Bera Eskubaloiak gertuen daudenei emandako babesa eskertu nahi du taldeak historian zehar lortu duen erronka nagusia ligan, bigarren postua eta Champions jokatzeko aukera datorren denboraldian eta, hortaz gain, Kopan azpitxapeldunak izan ziren donostiarrak. Horrela, Bera Berak larunbateko partida Bidebietan 7etan Ucam Murciaren aurka (ETBK SAT) festa bihurtu nahi du, bertan jokalariak eta entrenatzaileak txalotu, harrobiko taldeei egindako lana goraipatu eta babesle nahiz instituzioen babesa eskertu –Gipuzkoako foru Aldundia, Donostiako udala, Eusko Jaurlaritza- eta gainontzeko entitateak, guztiek Bera Bera Eskubaloia bermatzen baitute. ‘Zu ere Champions zara’ lemapean Bera Berarekin lotuta dagoenari lortutako balentriaren partaide egin nahi du klubak. Horregatik, Bera Berak publikoa animatzen du eta eskubaloiaren zaletuari Bidebietara etortzea larunbatean. ETB K SATek zuzenean eskainiko du partida Euskaltel eta BAT Basque Team Fundazioak emakumeen kirolari ematen dioten babespean. Ondoren, Bidebietako udal pilotalekuan jarraituko du festa. Partidan Bera Berak jarraian hamaikagarren garainpen lortu nahi du, hamabigarrena bigarren itzulian eta 17. azkeneko 18 norgehiagoketan. Carvalho partida batez zigortuta dago eta larunbateko norgehiagokan nor izango den taldeko golegile nagusiena erabakiko da, Eli Pinedo edo Bea Fernándezek, Eider Rubiok zailago baitu. Ezker hegalak 108 gol daramazki; kantabriar lateralak, 106 eta zentrala donostiarrak, 99. Alkatea eta Kiroletako foru diputatua Horrela, Bera Bera Eskubaloiak eskertu nahi die partida aurretik entitate ezberdinei eta instituzioei emandako laguntza. Donostiako udalak ostiralean 1,30etan taldeari harrera egingo dio eta Juan Karlos Izagirre alkatea eta Josu Ruiz Kiroletako zinegotzia larunbatean Bidebietan izango direla ziurtatu dute. Era berean, bertaratuko dira Kultura, Gazteria eta Kiroletako foru diputatu Ikerne Badiola eta Gipuzkoako foru Aldundiko kiroletako zerbitzu buru Carlos Alfonso. Datorren urtean taldetik urrun egongo diren jokalariak agurtuko dira. Dara Carvalho, Anna Punko, Melinda Berta, Anita Campa eta Bea Fernándezen profesionaltasuna azpimarratu du Bera Berak, izandako inplikazioa goraipatu du eta ibilibide arrakastatsua opa die.

11 Maiatza 2012

Donostiako udalak Bera Bera Eskubaloia omendu du gaur eguardian bihar Ucam Murciaren aurkako partidarekin (Bidebietan, 19etan ETBK SAT) amaituko den denboraldi bikainagatik.

Donostiako alkate Juan Karlos Izagirre; Kiroletako zinegotzi Josu Ruiz eta gainontzeko alderdien zinegotziak parte hartu dute udaleko areto nagusian egindako harreran, bertan izan direlarik, Kultura, Gazteria eta Kiroletako foru diputatu Ikerne Badiola eta Gipuzkoako foru Aldundiko kiroletako zuzendari Asier Sarriegi. Donostiako harrera argazkietan

Izagirrek sarreran onartu du “emozionaturik” dagoela “egin duzuen denboraldia txalotzeko gogokin negoelako”, izan ere, “lorpenaz gain, -Ligan eta Kopan azpitxapeldunak eta Champions jokatzeko aukera datorren denboraldian- eredugarri zarete, zabaltzen dituzuen baloreak oso positiboak dira, jokalariak oso ondo zaintzen dituzue, esfortzu handia egiten duzue eta pozik nago historiako sailkapen onena lortu duzuelako”.
 
“Horrez gain –jarraitu du Donostiako alkateak- Donostiako enbaxadore bihurtzen zarete Europan aritzen zaretenean” eta ziurtatu du “Udalaren asmoa emakumeen kirola sustatzea dela”. Honen harira, onartu du “harritu nintzela Bidebietara joan nintzenean, egin zenuten jokuaz gain, gauzak nola egiten dituzuen txalogarria delako, zaletu leialak dituzuelako eta adierazi zenuten gertutasuna azpimarratzekoa delako”.

Asteburu honetan Olatu-talka programazioarekin bat eginda, alkateak eta kirol zinegotziek Europako Kultur hiriburuen inguruko kamisetak banatu dituzte Bera Berako jokalarien artean.

“Donostia 2016 ere, Champions da”

Bestalde, Bera Bera Eskubaloiko presidente Amaia Ramírezek onartu du “txundituta gelditu naiz” alkatearen hitzekin eta eskertu du Udalari “eta hiri osoari Bera Beraren bidaia honetan partaide izan zaretelako eta olatuen bitartez Donostia eta Europa osoa energiaz beteko dugulako”. “Horregatik, esan dezakegu Donostia 2016 ere, Champions dela”.

Eta Matxalen Ziarsolo kapitainak talde osoaren izenean “poza” zabaldu nahi izan du “Ligan eta Kopan azpitxapeldunak izan garelako, datorren urtean asko kostatu zaigun Championsekin disfrutatuko dugu” eta eskertu du “DOnostiako udalari, Gipuzkoari eta babesle guztien emandako babesa lorpen hau zuena ere badelako”. Ikus Matxalen adierazpenak bideoan

Ekitaldia amaitu aurretik, Juan Karlos Izagirre alkateak eta Josu Ruiz kiroletako zinegotziak plaka bat oparitu dio Bera Berari eta klubak, berriz, jokalari guztiek sinatutako kamiseta eman dio Udalari.

Argazki batekin amaitu da harrera, Bera Bera Eskubaloia osoa alkatearekin, zinegotziekin, foru diputatu eta kiroletako zuzendariarekin.