Jada badakizkigu hurrengo asteburuko Bera Berako taldeen partiduen orduak. Lehia guztiak larunbatean izango dira.
Infantilak, ohitura den moduan, larunbat goizean arituko dira. 10:10etan, Pasaiako Kiroldegian A taldeak Ereintza A-ren kontra arituko da. Bera Bera B taldea bestalde, 10:00etan Bidebietan jokatuko du Leizaran A-ren aurka.
Bi ordu beranduago, Bidebietan beste partidu bat jokatuko da, kasu honetan kadeteena, Aloña Mendi B-ren aurka arituko dena.
12:30etan Pulpo K.E eta Bera Bera senior taldearen arte lehia hasiko da. Zumaiako Lubaki kiroldegian izango da. Arratsaldean, Ohorezko Mailakoen partiduaz gain, Egia Bera Berako jubenilek Pulporen aurka jokatuko dute 17:30etan Egiako kiroldegian.
Bera Bera eskubaloi taldearen Nagore Arizaga jokalari gazteak Gipuzkoako Foru Aldundiaren Etorkizuneko Jokalari saria jaso du, orain arteko ibilbide bikainagatik, eta duen etorkizun paregabearengatik.
Etorkizuneko Kirolariaren designazioak diru sari batetaz gain, EUTSI KIROLARI! programan sartzeko aukera dakar. Hau Gipuzkoako Foru Aldundiak Gipuzkoako etorkizuneko jokalariei zuzentzen dien programa da.
Gainera, abenduaren 22an, gipuzkoako kirolaren ospakizunean, Nagore Arizagak bere omenaldia jasoko du eman zaion saria dela eta.
Nagore denboraldi honetan iritsi da Ohorezko Mailako taldera, baina orain arte ezin izan du partidurik jokatu lesionatuta egon delako. Beste kategorietan eman dituen pausoak ezin hobeak izan dira. Infaltiletan eta kadeteetan, hainbat sari jasotakoa da, Leizaran taldean zebilenean.
Behin Bera Bera-ra iritsita, jada jubenil mailan, bi urtez jarraian gipuzkoako jokalari onenaren saria jaso du Gipuzkoako Federazioaren eskutik, eta 2009an baita ere euskal jokalari onenaren saria jaso zuen Euskal Federazioak emanda. Gainera, Espainiako selekzioak 10 aldiz deitu du.
Dudarik gabe, Bera Beraren etorkizuneko lider baten aurrean gaude. Zorionak Nagore!!!
Azken asteetako ohitura jarraituz, aste honetan ere Ohorezko Mailako taldearen partiduaren atsedenaldian, bizikleta bat oparituko da. Gogoratu aste honetako partidua 19:00etan hasiko dela, eta Elche izango dugula arerio.
Hala ere, ez da eguneko sari bakarra izango. Bizikletaz gainera La Perla Talasso Zentrora joateko bi gonbidapen zozketatuko dira. Estatuko talassoterapia zirkuitu onenetakoa da, 1h 45minututan ezagutzeko aukera izango duzuna.
Bi sari hauek irabazteko aukera izateko, euro bakarrean salduko dira errifak. Animatu eta irabazi Bera Berarekin!
Azaroaren lehen asteburua Bera Beraren harrobiko talde guztien garaipenarekin itxi zen. Horrela, guztiak sendo jarraitzen dute euren mailatan.
Infantiletako bi taldeak izan ziren sua pizteko arduradunak. A taldeak Bidebietan 17-8 emaitzarekin gainditu zuen Bidebietan Urnietako B, eta B taldeko neskek Donostiara ekarri zituzten puntuak Errenteriatik, Ereintza B 6-22 gainditu ostean.
Kadeteak bestalde, bat barkatu gabe jarraitzen dute, eta Aiala B-ren gainetik pasa ziren Zarautzen, 25-31 irabazita.
Jubenilek izerdia bota behar izan zuten Andoainen Leizaran gainditzeko, baina azkenean euren helburua lortu zuten, larri bada ere, 22-23ko emaitzarekin. Bukatzeko, seniorrek ere ez zuten kalerik egin, eta Bidebietan 43-26 irabazi zioten La Salleri.
Azaroan jada, maila guztietako ligak fase erabakarriago batean ari dira sartzen. Horregatik, larunbat honetan Bera Beraren harrobiko taldeek euren ibilbide onak berresteko beste aukera bat izango dute.
Infantilen A taldea hasiko da, goizeko 10:30etan Urnietako B-ren aurka Bidebietako Polikiroldegian jokatuko duen partiduarekin. B taldea bestalde kanpoan arituko da, Errenteriako kiroldegian. Ereintza B izango du arerio 12:30etan jokatuko den partiduan.
Arratsaldean kadeteak, jubenilak eta seniorrak arituko dira. Lehenengoek 17:30etan Zarautzeko Antoniano Kiroldegian Aiala A-ri bisita egingo diote. Egia Bera-Bera taldeko jubenilak Andoaineko Alurralde Kiroldegian Leizaran-en aurka jokatuko dute bestetik. Eta bukatzeko, seniorrek ligari ekingo diote berriro ere La Salle-ren aurka. Bidebietan jokatuko da lehia hau 20:00etan.
