Bera Bera - Berriak

01 Apirila 2012

Hitzordu interesgarria genuen Bidebietan arratsaldean Bera Berak eta Mar Saguntok jokoan asko zutelako eta bien arteko lehiak bereziak izan baitira beti. Norgehiagokaren garrantzia pistan antzeman da, defentsek erasoak gainditu dituzte, batez ere, lehenengo zatian.

Bera Berak bigarren posturako lehiatik kanporatu nahi zuen gaur bertan Mar Sagunto eta helburua lortu egin du defentsan egindako lanari eta elkartasunari esker. Valentziarrak, Escribano eta Patri Alonsok zuzenduta gipuzkoarren sei metrotako marra bilatzen zuten etengabe. Hori ekiditeko Reyes Carrerek horma jarri du bertan: Campa, Punko, Dara Carvalho, Bea Fernández eta Eli Pinedo.

Aurreneko ordu laurdenean valentziarrek hiru gol sartu dituzte eta horietako bat, penaltiz. Halere, Bera Berak erasoan ez du asmatu, baloiak galdu ditu eta 24. minutura arte ez du tartea zabaldu (10-7), Libe Altunak klubeko 17.000 golari esker, hain zuzen. Reyes Carrerek Ziarsolo eta Menéndez sartu ditu pistara.

Abantailari eutsi ordez, Bera Berak azkarregi jokatu du eta Escribanok bi kontraerasoetan gol batera hurbildu du bere taldea atsedenaldira iritsi baino lehen (11-10).

Bigarren zatian, Eider Rubiok Vero Cuña ordezkatu du zuzendaritzan. Donostiarrek defentsa estutu dute, valentziarren hegalek Darly Zoqbi gainditu ez bazuten ere Mar Saguntok partidari eutsi dio Patri Alonsori esker –10 gol sartu ditu- eta Bera Berak jasan izan dituen kanporaketak lagun, partida osoan sei eta bigarren zatian, lau.

Patri Alonsoren aurreneko kanporaketak Bera Berari arnasa eman dio markagailuan. Hamaseina berdintuta zirenean, donostiarrek 3-0 partziala lortu dute 15 minutu falta zirela. Abantail hori orain ondo kudeatu du Bera Berak Anna Punko eta Bea Fernándezen inspirazioari esker.

Ondorioz, balio handiko bi puntuak Bera Berarentzat. BM Alcobendasek bakarrik atzeratu dezake helburua. Madrildarrek Itxako gainditu ostean sei puntura jarraitzen dute, lau jardunaldi falta direnean. Bidebietan 11 golez galdu zutenez, apirilaren 21ean Pabellon de los Sueños kiroldegian berdinketa batek bigarren postua emango lioke Bera Berari.

Fitxa:

Bera Bera 27 (11+16): Zoqbi, Altuna (1), Campa, Bea Fernández (5, 2 p), Punko (7), Carvalho (3) eta Pinedo (3) –titularra- Cuña (1), Ziarsolo (3), Menéndez, Rubio (2, 1p), Berta (1), Yamiley (p.s.) eta Arizaga (1).

Mar Sagunto 22 (10+12): Álvarez, Gutierrez (1), Patri Alonso (10, 5 p), Mateo (4), Escribano (5), Chavez eta Saavedra –titularra- Alicia Fernández (2) eta Gadelha (p.s.)

Epaileak: Álvaro Ruiz eta David Zapico (Asturiarrak) Kanporaketak: Carvalho (2), Menéndez, Ziarsolo (2) eta Bea Fernández Bera Beratik eta Alicia Fernández eta Patri Alonso (2) Mar Saguntotik.

Partzialak: 1-1, 3-2, 5-3, 7-6, 10-7, 11-10 –atsedenaldian- 13-11, 17-15, 19-16, 21-18, 23-19 eta 27-22

31 Martxoa 2012

Gaur arratsaldean Bera Berak emakumezkoen eskubaloi ligako 22. Jardunaldiko partidari ekingo dio Mar Saguntoren aurka, valentziarrak bigarren postua lortzeko borrokatik baztertzeko asmoz.

Donostiarren aurreneko aukera da gaurkoa, ondorioz, ilusio handiz arituko dira Bidebietan, arratsaldeko 7etan, beste urrats ematera helburua lortze aldera eta sailkapenak eskaintzen duen tartea lagun. Aitzitik, valentziarrek ez badute garaipena lortzen ezin izango dute aurten azpitxapeldun gelditu.

Atzo, ustekabean, BM Alcobendasek Itxako gainditu zuen Lizarrerian (27-28). Honek esan nahi du Bera Berak matematikoki bigarren postuaren jabe egiteko gutxienez madrildarren aurkako (apirilaren 21ean) partidari arte zain egon beharko dutela.

Mar Sagunto (eta bestelako izenak) arerio arriskutsua izan ohi da Reyes Carrereren jokalarientzat. Prestatzaileak berak Patri Alonso, Alicia Fernández eta Bea Escribano azpimarratu zituen, batez ere Alonso “jokua zuzentzen duena eta taldekideak hobeak dira bere ondoan”. Sei metrotara hurbiltzen saiatzen da beti Mar Sagunto. Hori ekiditeko Bera Berak sendo defendatu nahi du eta eserlekua mugitu “jokalari gehiago ditugu eta honek partida desoreka dezake” Reyes Carreren ustez.

“Defentsan sendo ez bagaude, arazoan izango ditugu” ohartarazi du prestatzaileak. Era berean, bere jokalariak animatzen ditu “joku alaia egiteko, Bidebietaren gustukoa”.

Horretarako, lehenengo itzulian bezala, Darly Zoqbiren inspirazioa beharko du Bera Berak, horrez gain, Eli Pinedo, Bea Fernández eta Dara Carvalho internazionalen zirtadak; Eider Rubiok gerrialdeko minak gainditzea eta Vero Cuñak gidaritzarekin asmatzea, Anna Punkoren kanpoko jaurtiketa, Altuna, Berta eta Ziarsolok asmatzea kontraerasoetan eta Menendez, Campa, Arizaga eta Yamiley adi eta prest egotea edozein momentutan pistara sartzeko.

30 Martxoa 2012

Asteburua gaur arratsaldean hasiko da Bera Berako harrobiarentzat. Izan ere, udazkeneko kopa prestatzeko lehiaketan Egia Bera Berak azken jardunaldiari ekingo dio gaur 19,45etan, Oñatiko Zubikoa kiroldegian, Aloña Mendiren aurka. Donostiarrek lehiaketa irabazita izan arren gustuko dituzte Debagoienan ematen diren norgehiagokak.

Bestetik, Bera Bera Egia Infantil A taldea bihar Elgoibarren arituko da goizeko 11,15etan Federópticos Ikus Elgoibar liderraren aurrean. Bera Bera Egia Infantil B taldeak, aldiz, Eibar Eskubaloia hartuko du igandean Bidebietan, goizeko 10etan.

Azkenik, Egia Bera Bera eta Bera Bera Egia kadete 1 taldeen arteko derbia bertan behera gelditu da.

30 Martxoa 2012

Bihar betiko orduan eta lekuan, arratsaldeko 7etan, etxean, Bidebietan, alegia. Historikoa izan daiteke partidan Bera Berak Mar Sagunto hartuko du, hirugarren sailkatua eta Donostian donostiarrek birritan baino ez dute gainditu. Garaipenak Championseko ate ondoan kokatuko luke Bera Bera, donostiarrentzat balentria izugarria azpitxapeldunak ez baitira sekula izan. Donostiarrek irabaziz gero zortzi puntura utziko dituzte valentziarrak, hau da, gaindiezinak izango lirateke emakumezkoen eskubaloi liga amaitzeko lau jardunaldi falta direnean. Gaur arratsaldean Bera Berak Lizarrerian izango ditu belarriak jarrita, izan ere, Itxakok BM Alcobendas mendean hartuz gero donostiarren helburua gertuago legoke. “Hitzordu historikoa da 20 urte kosta zaigulako hona iristea eta garaipenak kluba beste maila batean kokatzen du” adierazi zuen asteartean prentsaurrekoan Reyes Carrerek. Partidaren inguruko guztia prest dago. Matxalen Ziarsolo kapitainaren hitzetan “ilusio handiz gaude, bigarren izateko gogokin eta, egia esan da, uste dugu bai taldeak bai klubak merezi dugula”. Bidebietan sinistu Bera Bera Eskubaloiak dei berezia egin nahi dio zaletuari Bidebietara hurbiltzeko taldea animatzera, Lada Togliattiren aurkako kanporaketan Gascan bezala ikuskizunaz gozatzeko eta proiektuaren partaide izateko. Datorren urtean Championseko ateak jokatzera daramatza garaipenak. Matxalen Ziarsolok adierazi zuen bezala “eskubaloi zaleari eta gure ondoan egon direnei dei egiten diegu Bidebietara etortzera gu animatzera eta historikoa izan daitekeen partida disfrutatzera”. Bidebietan asko sinesten du talde honek, porrota bakarra jaso du Itxakoren aurka. Eta taldeak konfidantza osoa du bere jokuan, izan ere, azkeneko 14 partidatatik 13 irabazi dituzte. Eider Rubiok minekin jarraitu arren, taldeak Mar Sagunto gainditzea espero du eta martxoan Champions postua berretsi. Nork esango zuen!

29 Martxoa 2012

Bera Bera Eskubaloia ahalik eta ondoen prestatzen ari da Mar Saguntoren aurkako partida, larunbatean Bidebietan arratsaldeko 7etan, lau jardunaldi falta direla bigarren postua berretsi dezakeen norgehiagoka, hain zuzen. Atzo entrenaldi fisikoa burutu zuten goizean, arratsaldean Donibaneko mutilen aurka lagunartekoa jokatu zuten. Gaur internazionalak bueltatu dira taldera, arerioaren bideoak ikusi dituzte eta entrenaldi saioa burutu. Bihar Bidebieta kiroldegia itxita egongo da greba orokorra dela kausa eta, ostiralean, azken saioa Mar Sagunto hartu aurretik, hirugarren sailkatua donostiarrek baino sei puntu gutxiago dituelarik. Reyes Carrerek aipatutako “hitzordu historiko” honen aurrean, Eider Rubio zentrala duda da. Donostiarrak etxean gelditu behar izan zuen Castro Urdialesen aurkako partida gerrialdeko mina zuela eta egun ez da guztiz osatu. Atzoko prentsaurrekoan Reyesek berak onartzen zuen Eider Rubioren partaidetza kokolan zegoela. Saguntoren aurrean, bi garaipen baino ez Valentziarrak oso arerio gogorra izan ohi da Bidebietan. Izan ere, Bera Berak bost aldiz baino ez dio irabazi, birritan Donostian eta hirutan Sagunton. Hori bai, garaipen gehienak azkeneko urtetan eman dira, besteak beste, iaz Bera Bera 29-26 nagusitu zen, 08-09 denboraldian Bidebietan 40-34 eta 28-30 Sagunton eta oraindik taldeak gogoan du aurtengo denboraldian lehenengo itzulian eman zen garaipena (21-25).