10 Maiatza 2013

Asteburuko talderik goiztiarrena Bera Bera Egia Infantil Bi taldeak Usurbilen izango du jokoan Gipuzkoako txapelketa. Finalerdietan bertako taldea izango du aurrean 9,30etan. Zentzu honetan, Bera Berak Federazioari ezadostasuna adierazi zion pista neutrala irizpidea ez delako kontutan hartu.
Bestetik, garaiz jaiki beharko du ere bai, Bera Bera Egia Kadete 1 taldea, izan ere, Elgoibarra abiatuko da Olaizaga kiroldegian 9,45etan Astigarraga Gys Elgoibarren aurka jokatzera.
Eguardian, Zarauzko Antoniano kiroldegian, Egia Bera Bera senior taldeak 12,45etan Aiala Zarautz KE. izango du aurrean.
Arratsaldean Bidebietan, Bera Bera Egia kadete 2 taldeak Eibar B hartuko du 17,30etan.
Eta igandean 12etan, alde batetik, Bidebietan Bera Bera Egia jubenil taldeak Ereintza Aguaplast izango du aurrean eta, bestetik, Bera Bera Egia Infantil Bat eta La Salle Legazpi Pasai Donibanen jokatuko dute.

10 Maiatza 2013

Kirolak txapelak aldez aurretik jarri ohi du eta askotan antolaturik ziren festak bertan behera gelditu dira. Horregatik, Bera Berako plantilla osoa ingurua bakantzen saiatzen da, partidaren garrantziaz ohartuz eta punturik urratzeko premiaz jabetu helburua lortze aldera. Izan ere 23 urte dira Bera Bera ohorezko mailara igo zenetik eta lehenengo aldia da liga eskura duela.
Astean zehar entzun diren ahots guztiek diote “emozioak alde batera utzi behar ditugu jokuari burubelarri ekiteko” Reyes Carreren hitzetan edo “partida iristeko irrikan gaude” ez du izkutatu Matxalen Ziarsolo kapitainak.
Bihar “partida dagoela” barneratua dute, izan ere, “oraindik ez gara txapeldunak, puntu bat falta zaigu eta aurkaria errespeta ezean partida galtzeko arriskua handiago litzateke” azaldu du Reyes Carrerek.
Matxalen Ziarsoloren ustez “sasoi onean iritsi gara, nahiz eta denboraldi amaierako ohiko minak agertu nonnahi, halere, dakigun moduan jokatuko dugu azken partida”.
Horrela, bihar 19etan –partida guztiak ordu berean- Bera Berak Castro Urdiales izango du aurrean -Agatha Gracía (Katalunia) eta Vanesa Pérez (Galiza)-. Azkena izan arren, Castro Urdialesek norgehiagoka berezia burutu nahiko du eta zailtasunak eman zizkion BM Rocasari duela hiru aste.
Bera Berako plantilla osoa Pachi Torre kiroldegira abiatuko da, Verónica Cuña eta Esther Arrojeria eta Uxue Ezkurdia gazteak, barne. Taldeak ez du bidaia bakarrik egingo, Erreka Laranja peña eguna pasatuko du Castro Urdialesen eta zalego asko kotxez gerturatuko da. Merezi du.

09 Maiatza 2013

Bera Bera Eskubaloia eta Elche Mustang taldea liga amaieran puntu bakar bateko aldearekin iritsi dira, 2009-10 denboraldiaz geroztik ematen ez zena, orduan, Itxakok eta Eldak azken norgehiagokan jokoan izan zuten liga. Nafarrek etxean 38-17 gainditu zuten Vicar Goya eta bigarren ligaren jabe egin ziren. Hurrengo bi denboraldietan tartea zabalagoa lortu zuten. Izan ere, azken hamarkadan kontutan harturik, azken jardunaldian erabaki da liga lau denboraldietan eta líder iritsi dena irabazi du, hau da, ez da iraulketarik eman. Elda Prestigio birritan, Astroc Sagunto –Eider Rubiorekin-, Cementos La Unión Ribarroja beste bitan eta Itxako lau alduz izan dira txapeldunak azken hamarkadan. Bera Bera edo Elche Mustang hasiberri dira horrelakoetan. 2009-10 denboraldiaz gain, 2006-07 denboraldian Cementos La Unión Ribarrojak bi puntuko aldea zuen Astro Saguntorekiko baina azken honek gol average delakoa alde zuen. Cementos taldeak 25-21 gainditu zuen Akaba Bera Bera eta bigarren aldiz txapelduna izan zen. Hurrengo urtean average delakoa erabakiorra izan zen. Elda Prestigio eta Itxako berdindurik iritsi ziren eta Parc Sangunto bi puntura. Alacantekoek nafarrei gol average irabazi zioten hiru golez baina valentziarrak hartu behar zituzten. Eldak 33-30 irabazi zion Saguntori azkeneko liga eskuratuz. Aurtengo txapelketa lortzeko -Bera Bera eta Elche taldeek Castron eta Castelldefelsen irabaziz gero- gutxienez 46 puntu beharrezkoak dira, kopuru horrekin azken hamarkadan zortzi liga eskuratuko lituzke eta beste batean, average delakoak erabakiko zuen. Hau da, aurten azpitxapeldun irtengo den taldea 2007-08 denboraldiko Itxakok (47 puntu) baino ez du gaindituko eta 2005-06 denboraldiko Saguntok berdindu. Iazko urte bikainak 45 puntu eman zizkion Bera Berari.

08 Maiatza 2013

Bera Bera Eskubaloiak antolaturik, pasa den astelehenean alebin eta benjamin mailako 36 gazte elkartu ziren eskubaloian sakontze aldera.
Bera Bera Eskubaloiko harrobiko arduradun Verónica Valverdek, Maria Gracia eta Susana Pozas entrenatzaileek zuzendu zuten saioa. Zegokien mailaz banaturik, gazteek eskubaloiarekin gozatu zuten Bidebietan.
Bera Berak horrelako ekimena maiatza eta ekaineko astelehenetan burutuko du 18,30etatik 19,30etara eta ekainean ostiraletan (17,30etatik 18,30etara) ere bai.