22 Abuztua 2013

Bera Bera Eskubaloiko harrokiak ere aurredenboraldiari heldu dio. Senior mailako jokalariek asteartean burutu zuten lan fisikoa Kristina Enean eta atzo Bidebietan egin zuten 16,30etatik aurrera. Egia taldearekin hitzarmena amaierara iritsita, Bera Berak euskal ligan senior mailako taldea ateratzeko erronkari eutsi dio Maria Gracia entrenatzailearen zuzendaritzapean. Bestetik, atzo jubenil mailako jokalarien aurreneko eguna izan zen, Bidebietako pista bitan zatitu zelarik. Bera Bera eta Angolako junior mailako selekzioaren arteko lagunartekoa aurretik, ordu beteko saioa zuzendu zuen Verónica Valverdek. Kadete mailako jokalariak, berriz, datorren ostiralean 17,30etan hasiko dira entrenatzen. Urtero bezala, Bera Berak kirolean orokorrean eta eskubaloain interesaturik dauden gazteei dei egiten die Bidebietatik pasatzeko kirol modalitatea frogatze aldera.

20 Abuztua 2013

Bera Bera Eskubaloia prestaketa jarraitzen ari da eta jokalariengan sortzen ari diren lesioak gainditzen. Bihar asteazkena, Bidebietan 18etan, Donostian jokatuko dituen hiru lagunartekoen aurrenari ekingo dio Angolako junior mailako selekzioaren aurka. Bera Berak Superkopako finala jokatuko du irailaren 4ean Rocasa ACE Gran Canaria taldearen aurrean Gascan (20etan, Teledeporte).

Aurrendeboraldiko laugarren norgehiagokari begira baja dira Vero Cuña eta Nitsan Dunay, ezker belaunean min hartuta. Zentral galiziarrak susto ederra hartu zuen, izan ere, ebakuntza egin zioten belauna bihurritu baizitzaion, ondorioz, beste 10 egun pistatik at egon beharko du. Israeldarra, aldiz, Mios Biganos Begles taldearen aurkako partidan lesionatu zen, jokalari frantses bat bere belauna gainea erori baitzen. Gaur goizean egin diote erresonantzia eta astean zehar emaitzen berri izatea espero du.
Patri Elorza, aldiz, taldekideekin aritu da gaur baina ez da ziur bihar lagunartekoan egongo denik.

Imanol Álvarez entrenatzaileak beste aukera izango du egoera ezberdinak frogatzeko, plantilla osoaren artean minutuak banatu, gazteak barne. Angolako junior mailako selekzioa, Faduran prestaketa betetzen ari denez, iritsiko da Bidebietara.
Datorren larunbatetik aurrera ondorioak ateratzeko moduan izango da Bera Bera. Superkopari heldu aurretik hiru lagunarteko izango ditu; larunbatean bertan (abuztuak 24) Leonen; abuztuaren 28an (asteazkena) Egiako txapelketan Mios Biganos Begles taldea izango du aurrean eta 31ean Kukullaga Etxebarri Bidebietan.

19 Abuztua 2013

Bigarren zatian egindako hasiera bikaina erabakiorra izan da Bera Berak markagailuan tartea zabaltzeko eta Zuazo Barakaldo gainditzeko Mendabian jokaturiko aurredenboraldiko hirugarren lagunartekoa. Hasierako abantaila (2-0) Zuazok berdindu zuen 15. Minutuan (5-5), hori bai, penaltiak gauzatuz. 23. minutuan sartu zuen jokaldian taldeko lehenengo gola Tania Yañezek. Eta Bera Berak 25. Minutuan gauzatu zuen lehenengo kontraerasoa Maria Núñezen aldetik. Eli Pinedo, Arizaga eta Ana Martínezek osatu zuten donostiarren lehenengo lerroa, Ziarsolo eta Castro alboetan, Ederra pibotean eta Yamiley, atepean. Elorza, Dunay eta Vero Cuñaren bajak eragin zuten Pinedo, iaz bezala, lehenengo lerrora itzultzea. Defentsak olinpikoak aurreratu zuen Imanol Álvarez entrenatzaileak. Zuazok ez zion abiadura ematen baloiari baino donostiarren kontraerasoak ez ziren iritsi. Halere, era berean, joku posizionalean Bera Berak sufritu zuen eta bizkaiatarrek sei metroetan sakondu zuten penaltiak probokatuz. Hasierako sei golak zazpi metroetatik iritsi ziren. 15. minutuan Imanol Álvarezek atsedena eman zien Ziarsolo eta Eli Pinedori, Ezkurdia eta Alba Menéndez sartuz. 20. minutuan Ana Martínezek Esther Arrojeriari utzi zion lekua eta Silvia Ederrak María Núñezi. Partida orekatua joan zen atsedenaldira arte (9-8). Bigarren zatian Matxalen Ziarsoloren segidan sarturiko lau golei esker –bi kontraeraso, penalti bat eta beste bat albotik- Bera Berak tartea zabaldu du (36. min 13-9). Ana Tempranok jokatu du bigarren zatian eta donostiarrek errepikatu dute partziala (43. min 19-10) partida erabakita utzita. Orduan Imanol Álvarezek Olatz Ramón, segituan Ederraren pasea gauzatu duena, eta Eider Lizarbe sartu ditu, azken minutuan sartu zuen gola ezker albotik. Bera Bera defentsak estutu du Zuazo, jaurtiketak galeraziz, izan ere, 27 minutuetan sei gol zeramaten bizkaitarrek. Bera Bera 25 (9+16): Yamiley, Castro (4), Ana Martínez (2), Pinedo (5), Arizaga, Ederra (2) eta Ziarsolo (7) –titular- Ezkurdia, Menéndez (2), Núñez (1), Arrojeria, Olatz Ramón (1), Lizarbe (1), Temprano (o.a.). Zuazo Barakaldo 17 (8+9): Esteban, Etxabe, Yañez (5), Álvarez (1), Hernández (1), A. Gil (2), Oihane Gil (1), Ahedo (1), Galarza (1), Bonilla (1), Cobo (3), Markaida, Aldekoa, Andrakas, Garazi Fernández, Verónica Fernández (o.a.) Epaileak. Juan Belloso eta Daniel Esparza (Nafarroa). Kanporatuak Arizaga, Pinedo, Castro eta Ezkurdia Bera Berarik eta Cobo eta Hernández Zuazotik. Partzialak: 3-1, 5-2, 5-5, 7-6, 8-7, 9-8 (atsedenaldia) 12-9, 16-9, 19-12, 20-13, 23-14 eta 25-17.

19 Abuztua 2013

Espainiako selekzioak Poloniako Gdansk eta Gdynia hirietan ospatzen ari den 17 urte azpiko Eurokopako Maind Round fasera jokatzeko txartela lortu ez arren, Bera Berako jokalari Maitane Etxeberria ardura izaten ari orain arte txapelketa bikaina osatuz. Espainiak abuztuarren 15ean egin zuen debuta Errumaniarekin 31-25 galduz. Maitane Etxeberriak 52 minutu baino gehiago jokatu zituen eta zazpi jaurtiketatik bost gol gauzatu zituen. Hurrengo egunean, Portugal izan zen aurkaria eta Jenaro Félixen taldeak berdinketa baino ez zuen lortu (22-22). Maitanek partida osoa jokatu zuen, jaurti zituen sei baloiak sareetara sartu ziren, azkeneko bi golak egin zituen, partida birrtan berdintzeko balio zutenak eta selekzioko azken hamabi minutuko bi golak, hain zuzen. Puntu bakar baten jabe izan arren, Espainiako 17 urte azpiko selekzioak Main Round delako fasea jokatzeko aukera zuen. Halere, nahiz eta Polonia gainditu (25-30) ez zen nahikoa izan. Maiatane Etxeberriak norgehiagoka osoa jokatu zuen, zazpi jaurtiketatik bost gauzatuz. Ondorioz, Bera Berako eskuin alboko jokalaria oso txapelketa bikaina betetzen ari da. Hiru partidatan, 16 gol sartu ditu 20 jaurtiketatik, hau da, %80ko portzentaje handia lortuz eta, gainera, donostiarra da minutu gehien jokatu dituen bigarren jokalaria. Bihartik aurrera, 17 urte azpiko selekzioak Frantzia eta Holanda izango ditu aurrez aurre bederatzigarren postua lortze aldera.