ISO 9001 arau internazionalean ziurtagiria lortu eta urtebetera, SGS ziurtatzaile erakundeak gaur jarraipen auditorian burutu duen saioan Bera Bera Eskubaloiaren kudeaketa sistema ontzat eman du, erraztasuna azpimarratzeaz gain, erosketa prozesuan hobekuntzak adierazi dituelarik.
ISO 9001 araua betetze aldera, Grupo Gismaren laguntzarekin ezarri den sistemaren aplikazio eremua da denboraldiko planifikazioa eta eskubaloi partiden antolaketa.
Sistemari esker, Bera Berak prozesu garrantzitsuak identifikaturik ditu, helburuak zehazten ditu, horien jarraipena egin eta, era berean, hobekuntza bilatzen saiatzen da.
Argazkian: Bera Berak ziurtagiria eskuratu zuen egunean SGSeko arduraduna, Jon Ander Madariaga; Asier Sarriegi, kiroletako foru zuzendaria eta Gorka Sedano, Grupo Gismako gerentea.
Donostiako udalak Bera Bera Eskubaloia eta Errealeko belar hockey taldeak omendu nahi izan zituen atzo batak eta bestean Kopan azpitxapeldun izateagatik.
Juan Karlos Izagirre alkateak, Kiroletako zinegotzi Josu Ruiz eta udaleko beste zinegotzi lagun, eskertu zuen “berriro ere zuen kirol ibilbidea eta gauzak egiteko moduak” eta azpimarratu zuen “zuen meritoak berdinak dira tituloekin edo gabe”.
Izagirrek harrituta esan zuen “hiri txiki honek emakumeen kirolak duen maila izugarri handia, horregatik ere ezaguna dena”. “Zuek goi mailako kirolariak zarete, gazteentzat edo ez hain gazteentzako eredugarri, neska eta mutilentzat ere zabaltzen dituzuen baloreengatik: lana, elkartasuna, esfortzua, maitasuna eta hona etortzen zaretenean ilusioa antzematen da” adierazi zuen. “Txapelketak lortuta edo gabe, zuen esfortzua eskertzeko deituko zaituztegu” amaitu zuen, ‘Donostiarrentzat beti Txapeldunak’ lelopean koadroa oparitu eta bertsoa bota aurretik:
Donostian jende pila
milaka izango dira
daudenak aste astero
zuen arianen begira
jokalariak zelaian
borrokan dabiltza trebe
distira berdina dute
zelaitik kanpora ere
hiri honek ondo daki
eskertzen ondo egindakoak
esfortzuak eta lanak
zuenak bezelakoak
segi astero erakusten
zuen baloreen sorta
txapeldun edo bigarren
ez zaigu hainbat inporta
Matxalen Ziarsolo y Maite Azkoaga kapitainek alkateari egindako harrera eta bere hitzak eskertzeaz gain, erronka berriak lortzen saiatuko direla esan zuten.
Zarauzko Aritzbatalde eta Orioko Karela kiroldegiek ostiraletik igandera bitartean Euskadiko txapelketako finalak hartuko ditu kadete neskak eta jubenilen mutilen mailetan.
Bera Berako kadete taldeak irekiko du lauko finala ostiralean 17,30etan Kukullagaren aurrean. 19,15etatik aurrera Tecnifuelle Elgoibar eta Aiala ZKE aurrez aurre. Larunbatean leku berean, donostiarrek elgoibartarrak izango dituzte aurkari 11etan eta zarauztarrak eta bizkaitarrak 12,45etan. Igandean Orion, Kukullaga eta Tecnifuelle Elgoibar 10,30etatik aurrera elkarren aurka artituko dira eta Bera Berak eta Aialak 12,15etan.
Euskadiko txapelketaz gain, lau taldeek Espainiako sektoreetako txapelketan aritzeko txartelak jokoan izango dituzte.
Igandean: senior, alebin, infantil eta eskola
Imanol Álvarezen Errotabarriren aurka gol bategatik galdu ondoren, igandean 9,30etan Egian, senior taldeak Jarrilleras hartuko du.
Bestetik, 12,15etan Yoldin, alebin neska taldeak Usurbilen aurka jokatuko du. Ordu berean, Bidebietan, infantil neska taldeak Eibar A hartuko du eta 13,15etan eskola Ereintzaren aurrean arituko da.
Ligako bi herenak igarota, bi hilabete t’erdiko lehiaketa gelditzen da eta zortzi partida, lau etxean eta beste horren beste kanpoan Bera Berarentzat.
Aste honetan ez dago ligako jardunaldirik selekzioetako konpromisoak direla eta, Bera Berako entrenaldietan eragina izango duena, alde batetik, Elorza, Núñez, Pinedo eta Temprano Jorge Dueñasekin daudelako eta Etxeberria eta Zaldua junior mailako selekzioarekin. Halere, Tati Garmendiak astelehenetik asteazkenera arratsaldez entrenaldiak burutuko ditu, ostegun goizean eta egun horietan mutilen talde baten aurka lagunartekoa jokatu nahi du. Taldearen gidaritzarekin egin zenetik Eider Lizarbe lehenengo astetik eta Maialen Husillos eta Udane Rodríguez aurrenekoan deitu ditu saioetara eta aste honetan gauza bera egingo du.
Egutegi zaila
Canyalmelar Valencia taldearen aurka itzuliko da ligara Bera Bera 19. jardunaldian. Donostiarrek Rocasarekiko bi puntuko aldea dute eta hiru Mecalia Atlético Guardésekin baina aurkariek baino egutegi zailago dute. Momentuz Alcobendaseko lehiatik eroso irten dira, Guardesek berdindu eta Rocasak galdu zuen pistatik, alegia.
Aste Santuak eragiten duen etenaldi ostean, Bera Bera apirilaren 11n Exeko Carrusen arituko da, orain arte donostiarrak ligan gainditu duen Elche Mustang (laugarrena) taldearen aurka jokatzeko. Apirilaren 25etik maiatzaren 30era bitartean ez da etenaldirik izango, hau da, sei partidetako azken txanpari egingo diote aurre taldeek. Bidebietan Valladolideko Aula Cultural izango da, maiatzaren 2an A Guardan jokatuko du Bera Berak, maiatzaren 9an Clínicas Rincón Málaga hartuko du, Teldera egingo du bidaia maiatzaren 16an jokatzeko Rocasaren aurka, Zuazo Bidebietan izango da maiatzaren 23an eta liga Leonen itxiko du maiatzaren 30ean.
Bestetik, Rocasak bost partida izango ditu Telden eta hiru etxetik kanpo: Valladolideko Aula Cultural, Clínicas Rincón Málaga, Carobels León, Bera Bera (maiatzaren 16an) eta Adesal Córdoba. Aitzitik, A Guardan (apririlaren 11n), Barakaldon (maiatzaren 9an) eta Granollersen jokatuko dute etxetik kanpo kanariarrek.
Mecalia Atlético Guardések ligari ekingo dio Málagan. Horren ostean, Barakaldo, Granollers eta Porriñon jokatuko du. Liga A Guardatik pasatuko da, izan ere, Rocasa eta Bera Bera (maiatzaren 2an) hartuko dituelako Guardesek, eta amaitzeko Adesal Córdoba eta Vivelafruta Castelldefels izango digu bisitari maiatza amaieran.
Bera Bera Eskubaloiak Alcobendaseko Pabellón de los Sueños pistan garaipen preziatua (28-32) eskuratu du, erasoan egoera onak, kontraeraso zitalak bitartez eta Ana Tempranok une zailenetan bi penalti gelditu ditu.
Bi zatien hasieran Helvetia Alcobendasek ezarri du komeni zitzaion erritmoa baina aurreneko zati erdialdean Bera Berak defentsan estutu du.
Tati Garmendiak, aulkian Montse Puche lagun, 6-0 ezarri du defentsan Elorza eta Núñez erdian, Menéndez eta Pinedo ondoan eta Martínez eta Etxeberria hegaletan. Elxetarra central moduan aritu da erasoan.
Aurreneko minutuetan oso erritmo altuan jokatu dute bi taldeek, baloia erditik azkar aterata. Golak alde batean eta bestean baina Bera Berak eutsi dio erritmoari: 9 min. 5-7. Halere, Núñez eta Elorza kanporatuak izan dira eta Alcobendasek ondo baino hobeto aprobetxatu ditu egoerak, Alba García aurkituz pivotean (12. min 9-8). Elorzak berdindu eta aurretik jarri du taldea, ondoren Etxeberria eta Pinedoren golei esker 0-4 partziala donostiarren alde (16. Min 9-12).
Mónica Ausas alboko jokalari kataluniarrak konfidantza hartu du eta Garmendia-Puche bikoteak partida gelditu du (19. min, 12-13, min 19). Eta ondo atera zaie. Defentsa hobeto kokatu, Núñez eta Ana Martínezen golak eta eragin handiko jokaldia. Kontraeraso batean Estela Carrera atezainak Maitane Etxeberriarekin talka egin duenez epaile poloniarrek ez dute zalantzarik izan: txartel gorria. Ziarsolok penaltia gauzatu du, Tempranok De la Cruzen jaurtiketa gelditu zu, Pinedok hegaletik gola sartu du eta Ana Martínezen beste batekin 0-5 eta (26. min, 12-18).
Atsedenaldian, 14-20 eroso eta ezohiko markagailua baina Menéndez kanporatua. Bera Berak sufritu du bigarren zati hasieran. Cardador eta Ausas jokalariek Helvetia Alcobendas gerturatu dute baina Pinedok moztu egin du erreakzioa (34. Min 17-21). Halere, donostiarrak baloiak galtzen hasi dira eta Sol Ceballos atezainaren aurrean ez dute asmatu. Menéndezek taldeko bigarren gola egin du 39. Minutuan (19-22) eta horrez ostean Ana Martínez izan da ardura hartu duena. Bere bi golei esker Bera Berak aurretik jarraitzen zuen (44. min, 22-25) baina Alcobendasek, Arderius gidari, gipuzkoarrak asko estutu ditu (47. min 24-25).
Garmendia eta Puchek hutsartea eskatu dute eta horren ostean jokaldi erabakiorrak etorri dira: Tempranok Francés jokalariari bostgarren penaltia gelditu dio berdinketa galeraziz, Ziarsolok asmatu du ate aurrean, Pinedok baloia lapurtu eta gauzatu du kontraerasoa, Tempranok Arderiusi gelditu dio penaltia eta Núñez eta birritan Ziarsolok, 24-30 ezarri dute markagailuan sei minutu falta zirela.
Ondorioz, garrantzi handiko puntuak Guardések berdindu eta Rocasak galdu zuen pistan. Orain, aste beteko etenaldia. Bera Berak Elorza, Núñez, Pinedo, Temprano eta Maitane Etxeberria eta Zaldua, hauek junior selekzioarekin, galduko ditu.
Fitxa: Helvetia Alcobendas 28, Bera Bera 32
BM Helvetia Alcobendas 28 (14+14): Carrera, Aramendia, Ausas (5), Arderius (5), García (4), De la Cruz (3) eta Francés (6, 4p) –titular- Sans (1), Ferrer, Cardador (2), Sol Ceballos (o.s.), Navas Flox (2).
Bera Bera 32 (20+12): Temprano, Etxeberria (2), Menéndez (3), Elorza (3), Nuñez (4), Martínez (6) eta Pinedo (7, 2p) –titular- Arrojeria (1), Ziarsolo (6, 2p). Deialdian: Ederra, Azanza, Arizaga eta Udane Rodríguez (o.a.).
Epaileak: Andrzei Rajkiewicz eta Jakub Tarczykowski (Polonia).
Kanporatuak: Sans, Alba García eta txartel gorria Estela Carrerari (23. min) Alcobendasetik eta Núñez, Elorza (2) eta Menéndez Bera Beratik.
Partzialak: 2-3, 5-7, 9-9, 12-14, 12-17, 14-20 –atsedenaldia- 17-21, 19-22, 23-25, 24-27, 25-30 eta 28-32.
