26 Uztaila 2012

Bera Bera Eskubaloiko jokalariei oporraldia amaitzeko astebete eskas gelditzen zaie, izan ere, abuztuaren 1ean, asteazken goizean, Anoetako miniestadioan hitzordua dute irailean 1ean Asfi Itxakoren aurka Superkoparekin irekiko den denboraldia prestatzen hasteko.

Eli Pinedo eta Patricia Elorza olinpikoak izan ezik –Hegoaldeko Korearen aurka egingo dute debuta larunbatean goizeko 11etan- guztira 12 jokalari bilduko dira Iker Fernández prestatzaile fisikoarekin hilabete batean sasoi onena lortze aldera, donostiarrek lehiaketa guztietan haiseratik onena eman behar dutelako.

Iaz Champions postuetan amaitu zuen taldearekin konparatuz gero, bost izango dira aurpegi berriak. Bidebietan jarraituko dute Darly Zoqbi eta Yamiley Rodríguez atezainek, ezker hegal Matxalen Ziarsolo eta Eli Pinedok, Eider Rubio, Verónica Cuña eta Nagore Arizaga zentralak, eskuin hegal Libe Altuna eta Alba Menéndez lateralak.

Eta Bera Bera Eskubaloiko fitxaketa berriak honako hauek: Patricia Elorza lateral arabarra, Nitsan Dunay israeldar internazionala, María Núñez eta Silvia Ederra piboteak eta Adriana Cardoso de Castro hegal ezkertiar brasildarra, Danimarkako Randers txapelduna taldean iaz jokatu zuena.

Superkopa

Bera Berak Itxakoren aurka ondo prestatu nahi du Superkopa. Izan ere Espainiako eskubaloi federazioarekin harremanetan hasi da partida Donostian jokatze aldera eta, ziur aski, irailaren 1ean ospatuko da. Donostiarrek irailaren 8an ekingo diote eskubaloi ligari Porriñon eta, Championseko multzoen fasera jokatzeko txartela eskuratzea da hurrengo erronka.

Horretarako Bera Berak Poloniako Vistal Laczpol Gdynia gainditu txapelduna beharko du irailaren 22an eta hurrengo egunean antza Viborg HK handia izango litzateke arerioa. Europa Iraileko kanporaketa irabaziz gero –oraindik ez da zehaztu non jokatuko den- Bera Berak Europako egungo txapeldun Buducnost izango luke aurrez aurre ligaxkan (Donostian, urriaren 20an), Alemaniako txapeldun Thüringer eta hiru hauetako bat: Frantziako Issy, Zvezda errusiarra edo Alemaniako Leipizg, Parisen jokatuko den kanporaketa bati heldu behar diotenek.

Kanporaketa gainditzen ez badu, Bera Berak badaki zer nolako arerioak izango dituen Errekopan (Cup Winners Cup’s) zozketa atzo burutu baitzen. Bigarren postuan geldituz gero, hau da, finalerdia irabazten badu eta finala galdu, Errekopak hirugarren kanporaketan (azaroak 10 eta 17) Bielorrusiako HC Gomel eta antza Poloniako Vistal Gdynia edo Brühl suizarra taldeen arteko irabazlearekin topo egingo luke Bera Berak.

Finalerdia galduz gero eta igandeko partida irabazten badu, Errumaniako HC Otelul Galati izango litzateke arerioa eta azkenak geldituz gero, Bielorrusiako HC Gomel izango luke aurrean urriaren 13 eta 20an, Errekopako bigarren txanda, hain zuzen.

Lagunartekoak

Abuztuan burutuko den prestakuntzan, Bera Berak bost lagunarteko ditu itxita: Zumaian abuztuaren 17an, Bidebietan 23an Frantziako Beglais eta 25ean Míos Biganos (Mireya González eskuin lateralaren talde berria), abuztuaren 30ean Itxakoren aurka Egiako txapelketan eta liga hasi aurretik, Mios Biganos taldeari bisita egingo dio irailaren 5ean.

Taldeak iaz bigarren postuaren jabe egin zen oinarri nagusiena mantendu du eta orain arte estatuko eskubaloiko erreferentziazko taldeek bizi dituzten gorabeherak –Asfi Itxakok zutabe nagusienak galdu ditu, Elda Prestigiok bere lekua saldu dio Zuazo Barakaldori, Valentziak jaso du Mar Sagunto eta jokalari erabakiorrak beste ligatan arituko dira- lehiaketak aukera bat eskainiko die donostiarrei, orain arte bezala kirol eta ekonomi arloetan oreka lortzea hizpide duen taldea.

12 Uztaila 2012

Espainiako Federakuntzan egindako zozketan 2012-13 eskubaloi ligarako zehaztu den egutegiaren arabera, Bera Bera Eskubaloiak Galizan egingo du debuta irailaren 8an, Porriñon, hain zuzen.

Hasiera hasieratik datorren denboraldian egingo duen ibilbidea zehazten hasiko da Bera Bera irailean bertan. Izan ere Itxakoren aurka Superkopa jokatu du aurreneko asteburuan, ligan Porriño ostean nafarrak berriro ere izango ditu aurrez aurre Bidebietako estrenaldian eta Championsen debuta egingo du irailaren 22 eta 23an multzon fasea jokatzeko eskubidea lortze aldera.

Champions Leagueari heldu aurretik, Ucam Murcia taldeak utzi duen hutsunea bete duen Etxebarriko Kukullagak Donostia bisitatuko du. Partida asteartean edo asteazkenean izango da irailaren 22an Bera Berak Poloniako txapelduna Vistal Laczpol zain izango baitu finalerdietan eta balizko finalean, Viborg izango du ustezko arerioa irailaren 23an igandean, oraindik ez da erabaki non burutuko den kanporaketan.

Erronkari heldu ostean, berriro Galizara. Oraingo honetan Pontevedrara egingo du bidaia, irailaren 29an igo berri den Atlético Guardés taldearen aurka jokatzeko.
 
Liga eta Europa

Partida eta gero aurreneko etenaldia iritsiko da. Bera Berak etxean hartuko du Mar Alicante urriaren 13an, halere, Championsen jarraituz gero partida aurreratuko litzateke, donostiarrek Alemaniara joan beharko dutelako Thüringen HC txapeldunaren aurka jokatzeko eta sei asteburu jarraian ligaxkari ekiteko Europako onenen artean, besteak beste, Buducnost txapelduna Donostian urriaren 20-21an ikusgai izango genuke.

Ligarekin jarraitzeko, seigarren jardunaldian Bera Berak gustoko ez duen pista bat bisitatuko du, Elcherena, alegia. Hurrengo astean Mar Sagunto jaso duen Valencia Aicequip taldea hartuko du Bidebietan eta zortzigarren jardunaldian Reyes Carrerek zuzentzen duen taldeak Alcobendas izango du helburu. Ondoren Bidebietan igoberri den E. Castelldefels ikusiko dugu eta etenealdi aurretik Leonen jokatuko du.

Serbiako Eurokopa eta gaboneak ostean, Bera Berak urtarrilaren 9an ligari ekingo dio berriro Bidebietan Zuazo Barakaldoren aurka, Eldak utzitako lekua erosi duena. Urtarrilaren 12an Kanarietara, Ro’casa izango da arerioa eta lehenengo itzulia Bidebietan amaituko du Castro Urdialesen aurka, San Sebastian bezperan.

Bigarren itzulia

Otsaileko aurreneko asteburuan hasiko dira bigarren itzulia eta Europako lehiaketak. Bera Berak Porriño hartuko du Bidebietan eta Europan jarraituz gero, aurreratuko litzateke partida. Gainera, bidaiak gertuenak izango ditu, Lizarrerian jokatuko du otsailaren hasieran eta Etxebarrin, ondoren.

2013ko otsailaren 14tik 17ra bitartean lehenengo itzuliko zortzi onenen arteko taldeek Kopa jokatuko dute (edo aurreneko zazpiak eta antolatzaileak). Martxoko aurreneko asteburuan itzuliko da liga eta asteburu bat salbu, maiatzaren 11rarte ez du etenaldirik izango, horrela, Bera Berak Castro Urdialesen amaituko du denboraldia.

Egutegia:
J1: Irailak 8: BM Porriño –Bera Bera Eskubaloia (bigarren itzulia: 2013ko Otsailak 2) J2: Irailak 15: Bera Bera Eskubaloia – Asfi Itxako (Otsailak 9)
J3: Irailak 22: Bera Bera Eskubaloia – Kukullaga (Otsailak 16)
J4: Irailak 29: Mecalia Atl. Guardes – Bera Bera Eskubaloia (Martxoak 2)
J5: Urriak 13: Bera Bera Eskubaloia – Mar Alicante (Martxoak 9)
J6: Urriak 20: Elche Mustang – Bera Bera Eskubaloia (Martxoak 16)
J7: Urriak 27: Bera Bera Eskubaloia – Valencia Aicequip (Martxoak 30)
J8: Azaraoak 3: BM Alcobendas - Bera Bera Eskubaloia (Apirilak 6)
J9: Azaroak 10: Bera Bera Eskubaloia - E. Castelldefels (Apirilak 13)
J10: Azaroak 17: Cleba León - Bera Bera Eskubaloia (Apirilak 20)
J11: 2013ko Urtarrilak 9: Bera Bera Eskubaloia – Zuazo Barakaldo (Apirilak 27)
J12: 2013ko Urtarrilak 12: Ro’casa - Bera Bera Eskubaloia (Maiatzak 4)
J13: 2013ko Urtarrilak 19: Bera Bera Eskubaloia – Castro Urdiales (Maiatzak 11)

11 Uztaila 2012

Bera Bera Eskubaloiak Bidebietan plantilla indartzeko bostgarren fitxaketa aurkeztu du gaur goizean. Silvia Ederra nafarra da, 28 urteko pibotea, aurten Lehenengo mailako Sporting La Rioja taldean aritu dena, halere, Itxakon, Mar Alicanten eta Castro Urdialesen ohorezko mailan eskarmentua duen jokalaria da. Lizarreko jokalaria “oso pozik” zegoen Bera Berakin sinatu duelako, “Itxakotik irten nintzenetik hona etorzea nuen helburu eta azkenean lortu egin dut”. Silvia Ederrak dio “Bera Berak guztia ematen du pistan, azkar jokatzen du eta Championsen arituko da, frogatzeko falta zaidan lehiaketa, hain zuzen”. Trafiko istripu baten ondorioz, Silvia Ederrak hernia diskala ebakuntza egin zioten eta iaz pistara itzuli zen Logroñon maila ona emanez. Horrela, bere burua “ondo ikusten du guztia emateko, taldeko jokalaria naiz eta defentsan eta erasoan aritzea gustoko dut”. Verónica Cuña, Patricia Elorza eta María Núñez taldekide izan ditu “gainontzekoak ere ezagutzen ditut, beraz taldeari egokitzeko ez dut arazorik izango”. Bestetik, Tati Garmendiaren ustez “Silvia Ederra indar handiko pibotea da, grina du, defentsan sutsu aritzen da eta badaki posizioa hartzen”. Bera Beraren helburuen inguruan galdeturik, Tati Garmendiak argi hitz egin du. “Gure erronka beti izan da txapelketa guztiak lehiatzea, Championsen zaila izango dugu batez ere Viborg tokatu zaigulako”. Halere, bere ustez “zuhurtzi guztiarekin aurten Liga hurbilago egon daiteke”. Silvia Ederra jokalaria Bera Bera Eskubaloiaren bostgarren fitxaketa da, Joku Olinpikoetan izango den Patricia Elorza, María Núñez, Adriana Cardoso eta Nitsan Dunay batera. Laterala baten bila dabil Tati Garmendia, halere, Bidebietan agertuko litzateke irizpide ekonomikoetan sartuz gero.

10 Uztaila 2012

Jorge Dueñas hautatzaileak Joku Olinpikoetan izango diren 14 jokalariak osaturiko zerrenda gaur jakitera eman du. Bera Berako jokalari Eli Pinedo eta Patricia Elorza datorren urtean Bidebietan arituko dena daude bertan.

Era berean, Londresen izango dira Nely Carla Alberto donostiarra eta Bea Fernandez kantabriarra, Bera Berako kamiseta defendatu duena azkenenko bi urtetan, Dara Carvalho pibote brasildarrak bezala.

Espainiako selekzioa Gijonen dago Joku Olinpikoak prestatzen. Faduran lanean dagoen Angolak selekzioaren aurka lagunarteko bi partida jokatuko ditu aste honetan, uztailaren 17an Kroazian beste bi lagunarteko izango ditu eta uztailaren 24ean abiatuko da Londresera. 

Dueñasen selekzioak Hegoaldeko Korearekin egingo du debuta Londresen uztailaren 28an (11,15etan). Bartzelona’92 eta Atenas’04 ostean hirugarren Joku Olinpikoak dira aurtengoak. Jokalari olinpikoen zerrenda