Etxaburuk bi arlo nabarmendu ditu. “Fisikoki taldea ondo dago, lan neketza betetzen ari da, zama handikoa baina ondo erantzuten ari dira jokalariak eta hirugarren astea amaitzear gaude”. Horrez gain Unibertsitate mailako mundiala dela eta beranduago etorri ziren jokalariak “fisikoki ondo etorri dira”.
“Aitzitik, -entrenatzailearen ustez- taktikoki asko falta zaigu, hobetzeko denbora izan arren”. “Bi lagunarteko jokatu ditugu –Zuazo eta Aula gainditu ditu Bera Berak- non fisiko arloa nabarmendu den, eta arlo taktikoa ia ez da agertu, baina ohikoa da aurredenboraldian eta kontzeptuak gutxinaka barneratu behar ditugu” azaldu du.
Lan horretan “guk ezarri nahi dugun joku estiloa landuko dugu orain, rolak azaltzen, errotazioak eta pixkanaka pixkanaka partidetan agerian utziz”.
Etxaburuk uste du, halere, “aldaketa handiak ez dira egin behar” nahiz eta aipatu “dena findu behar da, orkestra batek entseatzen duen bezala, guztiak batera joan gaitezen”. “Orain arte ez dugu lan horri lehentasuna eman, asko falta zaigu baina jakin badakigu jokalariek kontzeptuak segituan barneratzen dituztela”.
Bera Berako entrenatzaile berriak ez du nahi Superkopaz hitz egin nahi oraindik, irailaren 6an Rocasaren aurka Guadalajaran ospatuko dena. “Jakina dela gure aurreneko helburua baina egun gauzak ondo egiten saiatu behar dugu eta datozen lagunartekoei begira (hurrengoa larunbatean 18,15etan Bidebietan Zuazoren aurka) gauzak aldatzen joango gara, zorrotzagoak izango gara” dio Etxaburuk.
Taldea “itxitzat” jotzen du entrenatzaileak, halere komunikabideei adierazi die “gurekin Zarautz taldeko Andrea Zaldua dago entrenatzen”. Jubenil mailako internazionala da, 18 urteko albokoa, proiekzioarekin baina baita ere minutuak pistan behar dituena. “Gure asmoa da ahalik eta akordiorik onena lortzea, bai Andrea Zalduarekin, bai Zarautzekin”.
Lagunartekoa baino lehen, Peñafiel ezagutzeko aukera izango du taldeak, bazkaldu eta berehala Protos bodegari egingo dio bisita non Aula Culturaleko jokalariekin bat egingo duen.
16 jokalarik egingo dute bidaia. Horien artean, aurreneko aldiz arituko dira Maialen Múgica albokoa eta Maite Zugarrondo atezaina, azken fitxaketak, alegia. Era berean, taldearekin bat egingo dute María Núñez eta Ana Martínezek. Lau jokalari hauek ez ziren Barakaldon izan, ondoriz, larunbateko taldearekin konparatuz gero, Donostian geldituko dira Olatz Ramón pibotea eta Udane Rodríguez atezaina.
Bera Berak hurrengo lagunartekoa Bidebietan jokatuko du larunbatean, abuztuak 23, 18,15etan Prosetecnisa Zuazo Barakaldoren aurka.
Argazkia: Valentín González de Garibay.
