28 Abuztua 2014

Aurredenboraldiko bostgarren froga. Egindako lanak eragina dauka eta minutuak asko banatu behar dira lesioak saihesteko. Eli Pinedo baja izango da, esker aduktorean kontraktura bat duelako. Horrela, Bera Bera Elgoibarren aurkeztuko da gainontzeko plantillarekin eta bertan Uxue Ezkurdia eta Andrea Zaldua izango dira. Aurrean, Valladolideko Aula Cultural, iazko ligan gehien harritu zuen taldea eta donostiarrek Peñafielen, duela astebete, asko kostata gainditu zuena (22-26). Partida, Olaizaga kiroldegia, 19etatik aurrera. Gaurko lagunartekoari begira, Aitor Etxaburuk Ana Temprano –atzo atsedena hartu zuen- eta Amaia Azanza prest izango ditu –hegalekoak ezin izan zuen Orion parte hartu osasun arazoak kausa-. Aitzitik, María Akuña, Udane Rodríguez eta Olatz Ramón gazteak senior taldearekin arituko dira. Taldea entrenaldietara itzuliko da berriro bihar arratsaldean Bidebietan eta bere azken lagunartekoari helduko dio larunbatean (12,30etan) Egiako txapelketan, Frantziako Mios Biganosen aurka.

27 Abuztua 2014

Kilometroak egitasmoa dela eta, Bera Bera eta Aiala Zarautz taldeek lagunartekoa jokatu dute gaur oso itxura polita zuen Orioko Karela kiroldegian. Donostiarrak nagusi izan dira partidan batez ere kalitatea ageri delako eta prestakuntzan egun gehiago ere bai (19-29). Arrazoi ezberdinak direla eta ez dira izan Pinedo, Temprano eta Azanza, ondorioz, Aitor Etxaburuk bi talde osatu ditu zilarrezko mailan dagoen Aiala Zarauzen aurka jokatzeko. Bera Beraren kalitatea eta eserlekuan duen aukera nagusi izan dira gaur aurreneko minutuak izan ezik. Partida hasieran, Aiala Zarautzek hegalekoekin asmatu egin du eta 3-1 aurreratu da markagailuak. Halere, Bera Berak pase eta jaurtiketa okerrak zuzendu ditu eta Arizagaren bidez aurretik jarri da Ziarsolok kontraerasoa gauzatuz (4-5). Etxaburuk lehenengo zatia 6-0 defentsarekin jokatu du, Elorza –defentsan bakarrik- eta Múgica erdian, Ederra eta Arizaga lagun eta hegaletan, Etxeberria eta Ziarsolo. Ordu laurden eta beste zazpikotea, Akuñak Zugarrondo ordezkatu du eta sartu dira Arrojeria, Zaldua –Zarauzko jokalaria Bera Berarekin jokatzen duena – eta Martínez lehenengo lerroan, Núñez pinotean eta Ramón eta Ezkurdia hegaletan. Erasoan hobeto moldatu da Bera Bera, batez ere Núñez pibotearekin lotura osatuz. Horri esker, bost gol sartu ditu kanariarrak. Zalduak ere kalitatea erakutsi du bi golekin eta asistentzia eder batekin. Atsedenaldina, 11-16. Bigarren zati hasieran Bera Berak abantaila handitu (13-22) kontraerasoak gauzatuz. Aurreneko aldiz 5-1 defentsa ezarri du Etxaburuk Menéndez aurrean jarrita eta zarauztarrak hiru gol sartu ditu jarraiak baloia lapurtu ostean. Lehenengo zatian bezala, bi talde. Oraingo honetan, Udane Rodríguez izan da atepean eta bigarren taldean, Akuña. Ana Martínez aurrean kokatu da defentsan eta Ezkurdia bigarren zati osoa jokatu du, hegalez aldaturik. Bera Bera 29 (16+13): Zugarrondo, Etxeberria, Múgica (3), Menéndez (3), Arizaga (5, 2p), Ederra (1) y Ziarsolo (3, 1p) –titular- Ezkurdia (3), Zaldua (2), Arrojeria (2), Martínez (2, 1p), Núñez (5), Ramon, Akuña (o.a.) eta Rodríguez (o.a.). Kanporaketak: Martínez, Elorza eta Ramón. Partzialak: 0-0, 3-2, 5-6, 7-9, 9-14, 10-16 – atsedenaldia- 13-18, 13-20, 14-22, 15-25, 18-27 eta 19-29

26 Abuztua 2014

Aste honetan hiru lagunartekoei helduko die Bera Bera Eskubaloiak eta lehenengoa bihar arratsaldean izango da. Aurten Orion burutuko den Kilometroak egitasmoa dela eta, Bera Bera eta zilarrezko mailan dagoen Aiala Zarautz elkarren aurka arituko dira Karela Kiroldegian (18etan).
Partida horri begira, Aitor Etxaburuk jokatzeko moduan diren jokalari guztiak eramango ditu Eli Pinedo izan ezik. Atzo arratsaldeko entrenaldian gelditu egin zen ezker aduktorean kontraktura duelako. Ondorioz ez da Orion ezta Elgoibarren izango. Bere asmoa da atsedena hartzea, ostiralean entrenatzea eta ahal izanez gero Egiako partida jokatzea. Taldearekin aurrendeboraldia burutzen ari direnak, hau da, Uxue Ezkurdia, María Akuña, Udane Rodríguez eta Olatz Ramon Orion izango dira.
Bestalde, azkeneko bi urtetan Bera Berako bigarren entrenatzaile moduan egon dena, Martin Larrañagak abuztuaz geroztik Aiala Zaratuz zuzentzen du eta biharkoa izango da estrenaldia aurredenboraldian.
Bera Berak ostegunean, hilak 28, Elgoibarko Olaizaga kiroldegian (19etan) Valladolideko Aula Culturalen aurka jokatuko du. Eta larunbatean, hilak 30, donostiarrek Frantziako Mios Biganos izango du aurrean Egiako txapelketan (12,30etan).

25 Abuztua 2014

Italiar eta islandiar taldeek EHFko bigarren txandari dagokion kanporaketa Salernon jokatuko dute urriaren 17 eta 18an. Ondorioz, Bera Berak astebete lehenago jakin du Jomi Salerno edo Islandiako IBV taldeetatik nor izango den aurkaria EHF hirugarren txandan, azaroaren 15ean hasiko dena.
Horrela, Salernoko Palapalumbo kiroldegiak hartuko ditu bi partidak 18,30etan. Aurreneko jardunaldian italiarrak izango dira bertako taldea eta hurrengo egunean, islandiarrak, alegia.
Italiako txapeldun Jomi Salerno taldeak iaz Champions Leagueko multzoen fasera pasatzeko atarikoa antolatu zuen, oso talde indartsu bildu zituelarik: Errusiako Rostov, Frantziako Fleury eta Macedoniako Vardar. Fase honetako irabazleak Bera Bera zegoen Championseko multzoa osatu zuen. Vardarrek italiarrekin kupidarik ez zuen izan (35-16) eta hurrengo egunean Darly Zoqbi eta Bea Fernándezen Fleury gainditu zuen (33-25). Vardarren aurka debuta egin zuen Bera Berak Championsen Gascan (19-23). Jomi Salerno taldea laugarren gelditu zen Rostoven aurka (41-18) galdu ostean eta, ondorioz, Cup Winners’ Cupera pasatu zen.
Salernon jokatzen jarraitu zituen kanporaketa osoak. Suizako Spono Nottwill gainditu zuen bigarren txandan (61-42) baina hirugarrena ez zuen pasatzerik izan, Tertnes Bergen (58-49) Norvegiako taldea nagusi izan zen italiarrek aurreneko partida berdindu arren (33-33). Salernon baikor dira eta Islandiako IBV taldearen kanporaketa gainditzea espero dute.