Bera Bera - Berriak

23 Uztaila 2014

Amaia Azanza eta Maialen Múgicak bat egin dute adierazten Bera Beran jokatzearekin “ametsa bete dugulako” . Tati Garmendia eskubaloi arloko arduraduna eta Aitor Etxaburu entrenatzailea ondoan zituztela, Azanza eta Múgicak komunikabideen aurrean aurkeztu dira gaur eguardian Bidebieta kiroldegian. Alde batetik, Amaia Azanza, 24 urteko jokalari ezkerrak komentatu du “goi mailan jokatu nahi izan dut betidanik eta niretzako Bera Beran egitea pribilegioa da, egun titulu guztiak helburu dituelako”. Lizarrako hegalekoak esan du “ilusio handia egiten dit lehenengo aldiz Europan parte hartzea eta Kopan jokatzea ere bai”. Azanzak gaineratu du “Bera Bera beti gustoko izan dut, etxeko jendeari eta gazteei aukerak eman dizkielako eta horrek deigarria da”. Hori dela eta, “ilusio handiz nator, ikasteko gogokin” eta bere ustez “interesgarria da titulu guztiak helburu izatea”. Amaia Azanzak dio “pistan borrokalaria naiz” eta “esperientzia hartu nahi dut taldeari laguntzeko” . “Aukera honen zain egon naiz eta dudan guztia emango du” amaitu du. Azanza eta Múgica jokalariak taldea indartuko dute batez ere defentsa arloan Tati Garmendian eta Aitor Etxabururen ustez, nahi z eta erasoko errotazioan ere sartu, lehenengo lerroan eta Azanzaren kasuan ere eskuin albokoan. Maialen Múgica, 23 urteko zarauztarraren ustez Bera Berako plantillako kide izatea “urrats handia da”. Hegaleko jokalariak hiru denboraldi eman ditu ohorezko mailan BM Porriñorekin baina Bera Bera ikusten du “pausu bat aurrerago”. “Beti gertu izan dut, partidaren bat edo beste ikustera etorri naiz baina eskuraezina gisa ikusi dut. Orain ametsa betetzea bezalako da” aitortu du. Azkeneko bi denboraldietan birritan Liga, Kopa eta Superkopa eskuratu dituen talde batera sartzea ardura suposatzen du bere ustez, “aldea ez nabaritzeko maila ona eman behar dugu, ondorioz”. Horregatik, “lan gogorra egitera nator, defentsan taldea lagundu eta erasoan errotazioetan sartu”. Zarauztarrak, Ana Martínez eta María Núñez bezala, Espainiako Unibertsitate mailako selekzioarekin bat egingo du igandean Pontevedran abuztuko lehenengo astean Portugaleko Guimaraesen ospatuko den Mundiala prestatze aldera.

22 Uztaila 2014

Gaur eguardian Espainiako eskubaloi federazioan egindako zozketaren arabera, datorren 2014-15 denboraldia Bidebietan hasiko du Bera Berak ohorezko mailara igo berri den talde baten aurka, KH7- Balonmano Granollersen aurrean, hain zuzen.
Irailaren 6an (larunbata, 12,30etan) Guadalajaran Rocasaren aurka Superkopako finala jokatu ostean, Bera Berak ligako erronka berri bati ekingo dio irailaren 13tik aurrera. Bera Bera zuzendu zuen (2002-03 eta 03-04) José Luis Villanueva entrenatzaile duen Granollers taldea gaztea izango du aurrean.
Zozketa aurretik albistea baieztatu du Federazioak, Mar Alicante taldeak ohorezko mailan aritzeari uko egin dio bere lekua Adesal Córdoba taldeak hartuz. Andaluziarrek iaz sailkapenean azkenaurrenak izan ziren. Aitor Etxabururen taldeak egingo duen aurreneko bidaia ligan bertara izango da, Kordobara irailaren 20an, alegia.
Zozketak utzi duen irakurketa nagusiena da Bera Berak teorian diren aurkari indartsuenak lehenengo itzulian hartuko dituela Bidebietan: Porriño (irailaren 27an); Helvetia Alcobendas (urriaren 18an), Mecalia Atlético Guardés (aurreratuko den jardunaldian azaroaren 12ra, Europako joanekoa baitute batak eta besteak) eta Rocasa Ace Gran Canaria (urtarrilaren 17an). Bera Berak azpitxapeldunak hartuko ditu urtarrilean ligara bueltatzen direnean, Eurokopa ostean eta etxetik kanpo Kopako kanporaketari heldu ostean -astebete lehenago-, otsailaren 20tik 22ra bitartean lehian jarraitu ahal izateko gainditu beharreko oztopoa.
Ondorioz, Bera Berak kontu handiz ekin beharko dio bigarren itzuliari, Kopa ostean Bidebietatik at partida errazak egongo ez direlako, batez ere maiatzean Guardés, Rocasa eta Cleba taldeen aurka arituko delako. Iaz bezala, Leonen amaituko du denboraldia maiatzean 30ean.

Egutegia. 2014-15 denboraldia
1 Jardunaldia: Bera Bera vs Granollers Irailak 13. 2. Itzulia: 14. jard: 2015 Otsailak 7
2. J: Adesal Córdoba vs Bera Bera: Irailak 20; 15. J: Otsailak 14
3. J: Bera Bera vs BM Porriño: Irailak 27; 16. J: Otsailak 28
4. J: Castelldefels vs Bera Bera: Urriak 4; 17. J: Martxoak 7
5. J Bera Bera vs Helvetia Alcobendas: Urriak 18; 18. J: Martxoak 11
6. J Canyamelar Valencia vs Bera Bera: Urriak 25; 19. J: Martxoak 28
7. J Bera Bera vs Elche Mustang: Azaroak 1; 20. J: Apirilak 11
8. J Aula Valladolid vs Bera Bera: Azaroak 8; 21. J: Apirilak 25
9. J Bera Bera vs Mecalia Atl. Guardés: Azaroak 12 (aurreratuta); 22. J: Maiatzak 2
10. J Clínicas Rincón Málaga vs Bera Bera: Azaroak 19 (aurreratuta): 23. J: Maiatzak 9
11. J Bera Bera vs Rocasa Ace Gran Canaria: 2015eko urtarrilak 17; 24. J: Maiatzak 16
12. J Zuazo Barakaldo vs Bera Bera: Urtarrilak 24; 25. J: Maiatzak 23
13 J Bera Bera vs Cleba León: Urtarrilak 31; 26. J: Maiatzak 30

Egutegi osoa

Argazkia: Juan Antonio Garaikoetxea

22 Uztaila 2014

Emakumeen Ohorezko mailari dagokion Ligako egutegiko lehengo jardunaldia ezagutzera eman etan handik minutu gutxira, Bera Bera Eskubaloiaren izena Vienan agertu da, EHF Cupeko hirugarren kanporaketako zozketan, hain zuzen.
Donostiarrek lehenengo partida etxean jokatuko dute, azaroaren 15-16an bigarren txanda gaindituko duen taldearen aurka, Italiako txapeldun Jomi Salerno edo Islandiako IBV, Ligan finalerdietara iritsi zen taldea. Italiarrek zein islandiarrek Salernon elkar ikusiko dute urriaren 18-19an eta itzulera Islandia hegoaldean uharte batean dagoen Vestmannaeyjar hirian, urriaren 25-26an.
Eskubaloian Islandia erreferentzia handiko herria izan arren, IBV taldeak eskarmentu gutxi du Europan. Bi aldiz baino ez da izan bertan: 2000-01 denboraldian EHFn eta 2003-04an Challenge Cupean, finalerdietara iritsi zelarik. Ligan azkeneko hiru denboraldietan hirugarren gelditu da Liga erregularrean, play-offean final atarian geldituz.
Italiako txapeldun Jomi Salerno, aitzitik, 2000.ko lehenengo hamarkadan askotan aritu zen Europan. Iaz Champions Leagueko prebia antolatu zuen Salernon –Napolitik 55 kilometrotara-, eta WHC Vardar, Rostov eta Fleury talde handiak hartuz. Mazedoniarrek eta errusiarrek ez zuten kupitu. Ostean prebian nagusi izan zena eta Championseko Bera Berako aurkari Vardarrek 35-16 gainditu zuen Jomi Salerno eta hirugarrena izateko partidan, Rostovek 41-18.
Ondorioz, Cup Winners’ Cup jokatu zuten italiarrek, Spono Nottwil suizarra mendean hartu zuten (61-42) baina hirugarren kanporaketan Norvegiako Tertnes Bergen taldearen aurka galdu zuten (49-58).

EHF 2014-15

21 Uztaila 2014

Zozketa eguna biharkoa, Espainiako Eskubaloi Federazioko egoitzean goizeko 11etan hasiko da Emakumeen ohorezko mailako ligako egutegiarena. Lehiaketa irailaren 13an abian jarriko da eta 2015eko maiatzaren 30ean amaitu. Bestetik, bihar eguardia baino lehenago jakingo du Bera Berak EHFko aurkaria, izan ere, Vienan burututuko den zozketan azaroaren hirugarren txandari dagokion kanporaketa ere ezagutuko baita (joanekoa, 15-16an eta itzulera, 22-23an). Bertan 41 talde izango dira. Azaroan lehiaketari helduko dioten 23 taldeen artean dira gipuzkoarrak, ondorioz, gainontzeko 18 taldeek urrian kanporaketa jokatu beharko dute. Gainera, EHFk ezarritako rankingaren arabera Bera Bera bostgarren taldea izanik, aurkari zaileenak saihestuko ditu: Lada, Rostov eta Astrakhanochka errusiarrak, Buxtehuder eta Bayer Leverkusen alemaniarrak, Erdi HC eta Dunaujvarosi hungariarrak, Corona Brasov eta Dunarea Braila errumaniarrak, Danimarkako Esbjerg eta Tvis Holstebro, Pariseko Issy edo Rocasa kanariarra. Halere zozketan maila handiko taldeak gelditzen dira eta saihestu beharreko bidaiak. Bihar bertan kanporaketa osaturik gera daiteke edo urriko kanporaketaren zain egon beharko luke Bera Berak. Lehenengo kasuan aurkari gisa izan daitezke Mazedoniako Vardar (Championsen aritzen den filiala), Amsterdameko Succes Schooonmaak, Stabaek norvegiarra, Poloniako Metraco Zaglebie Lubin, Portugaleko Alavarium Love Tiles, Esloveniako GEN Zagorje edo Suediako Lugi Lund. Donostiarrek Skopje bezalako zailtasun handiko bidaiak ez dituzte nahi ezta ere Poloniako azpitxapeldun edo Esloveniako bezalako aurkariak. Aurreneko kanporaketari ekin behar dioten taldeen mailari erreperatuz, Eslovakiako Iuventa Michalovce agertzen da, gainera bidai ez eroso bati helduta, eta korapiloz beteriko beste hainbat desplazamendu: Ukrainia (Eslovakiako muga ondora), Bielorrusia, Faroe Irlak edo Islandia.

21 Uztaila 2014

Bera Bera Eskubaloiak plantilla osatzen jarraitzen du lehenengo lerroko bi jokalariekin, Maialen Múgica zarauztarra fitxatuz eta Ana Martínez elxetarrari kontratua luzatuz, ohorezko mailan jarraian 25. denboraldiari ahalik eta ondoen heltzeko.

Maialen Múgicak 23 urte berri bete ditu, 1,75 m. altuera du eta azkeneko hiru denboraldietan BM Porriño taldean jokatu du. Azken urte honetan erasoan ardura gehiago hartu du, Ligan ia ehun goletara iritsita.
Bestetik, abenduan 23 urte beteko dituen Ana Martinezek kontratua luzatu du Bera Berarekin. Elxetar hegalekoak iaz iritsi zen Bera Berara eta bere ekarpena erabakiorra izan zen tituluak lortzeko. Ana Martínezek liga sei partida eta Champions Leagueko hiru norgehiagoka galdu zituen Espainiako selekzioarekin sorbaldan izandako luxazioa dela eta. Ondorioz, kluba ziur da jokalariak aurten gehiago emango diola taldeari.
Jorge Dueñasen azken deialdietan izan da Ana Martínez. Orain, Unibertsitateko selekzioan izango da Maialen Múgica eta María Núñez bezala. Hirurak Pontevedran egon beharko dute uztailaren 27an, Guimaraesen abuztuko lehenengo astean burutuko den Unibertsitate mailako Mundiala prestatzeko.
Argazkian (Iris González): Ana Martínez eta Maialen Múgica, aurrez aurre.