Bera Bera - Berriak

25 Azaroa 2014

Gaur goizean Vienan burutu den EHFko zozketan final-zortzirenetan Bera Berari Turkiako txapeldun Muratpasa Belediye taldea egokitu zaio, Turkiako helgoaldean Antalya Mediterraneo Itsaso etzean kokatzen den hiriko taldea, alegia. Gipuzkoarrak etxean arituko dira otsailaren 7 edo 8an eta hurrengo astean bidaiatu egin beharko dute (otsailaren 14-15). Gainditu berri den hirugarren txandari dagokion kanporaketan, Muratpasa Belediye aise nagusitu zitzaion (62-41) Femina Vise belgiarrari, pasa den asteburuan Antalyan jokatu diren bi partidetan. Turkiako txapelduna egun hirugarrena da ligan baina partida bat gutxiago du bigarrena den Ankara Yenimahalle taldearen aurka jokatu behar duena. Ankarako taldeak estu hartu zuen Issy París (48-46) EHFko kanporaketan. Muratpasak bost partida irabazi ditu ligan Ardesen Gençlik liderraren aurka galdu du bakarra. Batez beste 32 gol baino gehiago sartu ditu eta, Ankararekin batera, gol gutxien jaso ohi duena (23,5). Plantillan Turkiarekin hiru jokalari internazionala dira eta bost atzerritar. Horien artean, Olga Laiuk, 30 urteko ukraniar internazionala, eskuin albokoa Sagunton jokatu zuena (09-10) eta Bera Berak gertu jarraitu zuena orduan. Antalyan laugarren denboraldian betetzen ari da eta belgiarrarren aurka joanekoa jokatu arren, 11 gol egin zituen. Eskarmentu handiko jokalaria, Europan 2001-02 denboraldiaz geroztik jokatu du talde ezberdinekin, gainera bere selekzioan leku finkoa du eta Hungaria eta Kroaziako Eurokopan egongo omen da da B multzoan. Horrez gain, Muratpasako plantillan Mazedoniako selekzioko bi kide dira, biak Metalurg taldetik Antalyara joan berri direnak, Zorica Despodovska ezker albokoa eta Dushica Gjorgjievska zentrala, abenduan 23 eta 27 urte beteko dituztenak. Pibotean 26 urteko Martina Pavic kroaziarra dute eta lehenengo lerroan 33 urteko Tanja Vuckovic serbiarra. Serbiako Zajecar taldetik, aurrenekoak hirugarren denboraldia betetzen ari da eta serbiarra, lehenengoa. Turkiako selekzioarekin dira 22 urteko Fatma Ay atezaina, 23 urteko ezker alboko Didem Hosgor eta eskuin hegaleko Esin Sagdic. Turkia Espainiako multzoan kokatu zen abenduko Eurokopa jokatzeko sailkatze fasean baina aise galdu zituen Jorge Dueñasen selekzioaren nahiz Holandaren aurka. Muratpasak eskarmentua eta gazteria nahastu ditu eta jokalari gehienak urteak daramate elkarrekin jokatzen. Antza, indarberritu da aurten, besteak beste, mazedoniako bi jokalariak, Vuckovic, Sagdic eta 20 urteko Cigdem Özcan zentrala fitxatu baititu. Turkiako txapeldunak ez ditu Europako lehiaketetan emaitza handirik, nahiz eta Challenge Cupetik hasi Champions Leagueko atariraino iritsi den. 2011-12 eta 12-13 denboraldietan Challenge lehiaketako finalera heldu zen eta bertan alde batetik Mios Biganosek gainditu zuen (55-61) eta hurrengoa Le Havren aurka (57-63) galdu. Horren ostean, Muratpasak Championseko atarian sartu zen, Bera Bera bezala, 2012-13 denboraldian. Turkiarrek aurreneko partida galdu zuten Errumaniako Universidad Jolidon Cluj (26-34) taldearen aurka eta bigarrena Serbiako Zajecarren aurrean (27-35). Cup Winners’ Cupen ezin izan zuten itzulerako partidan sei goleko abantailari eutsi Zagrebeko Lokomotiva taldearen aurka (aurten Championseko multzoen fasean) eta etxetik kanpo gol gutxiago sartzeagatik kanporatua gelditu zen. Hurrengo denboraldian, 2013-14, turkiarrak Championseko aurreneko txandan galdu zuten aukera, izan ere, Holandako Sercodak Dalfsen taldearen aurka bi partidetan porrot egin zuten kanporaketa osoa Antalyan jokatu arren. Cup Winners’ Cupen aise gainditu zuten Portugaleko Juve Lis 65-41 baina Errusiako Rostoven aurka hirugarren txandan 65-43 galdu zuten. Aurten Champions Leagueko atarian egoteko gonbidapena luzatu zuen Muratpasak baina, beste talde batzuei gertatu zitzaien bezala, EHFk ez zuen onartu eta, ondorioz, EHF Cupen dabil. Zozketaren iragartzaile edo ez, donostiarrak Salernotik Napoliko aeroporturaino autobusez egindako bidaian kanporaketako epaile turkiarrekin bat egin zutenez, Aitor Etxaburu zein Gari Garagarzak Muratpasa taldeaz galdetu zieten. Beraien erantzuna argia izan zen, talde ona dute. Zozketak ez du zapore txarrik utzi Bera Beran. Eskubaloi arloko arduradun Tati Garmendiak uste du “aurkari erraza ez da izango baina zailagoak baziren eta bidaia konplikatuak zituztenak ere bai, hau da, ahulenetarikoa da Muratpasa”. “Taldeak Europako lehiaketan duen ilusioa” berretsi du Garmendiak eta “kanporaketa irekia” ikusten du.

24 Azaroa 2014

EHF Cupeko final-zortzirentan zehaztuko diren zozketan izango da Bera Bera Eskubaloiaren izena, datorren asteartean, izan ere Palapalumbon 20-28 irabazi dio Jomi Salernori eta kanporaketa osoan, 57-39. Eta hori partida hasiera desberdina izan dela. Jomik hasierako taldea aldatu du, Beba mazedoniarrak zuzendu du jokua Avram eta Trombetta hegalekoak lagun eta Cassano taldeko Del Balzo pibotearekin lotura errazago eginez. Italiako internazionalak jaurtiketan asmatu du eta Jomik markagailuari eutsi dio (10. min 3-3) Bera Berak kontraerasoetan izan dituen akatsak lagun, aurreneko zatian bost irteera galdu baitira. Baliabide horrekin asmatzerik ez zegoenez, partidak pasaru ahala, Bera Berak lasaitasunarekin jokatu du eraso posizionaleak. Oraingo honetan Etxaburuk Arizaga jarri du taldea zuzentzen eta Menéndez eta Elorza albokoetan. Ederrak Núñez ordezkatu du erasoan eta Etxeberria eta Pinedo hegaletan. Beroketa ariketetan Ziarsolok belaunean zeozer sentitu du eta jokatzea baztertu du. Aurreneko zati erdialdean, Bera Berak tartea ireki du Pinedo, Menéndez eta Etxeberria jokalarien golei esker. Defentsa eta Tempranok neurria hartu die italiarrei eta 20. Minutuaren bueltan Etxaburuk Azanza, Arrojeria eta Múgica sartu ditu. Lizarrakoak, Pinedoren beste bi eta Arrojeriak sartutakoarekin donostiarrek partida apurtu dute (23. Min 6-12). Atsedenaldia joan aurretik Pinedo ordezkatuz Arizaga hegaletik pibote postura mugitu da gola eginez, hortaz, ia ostirala bezala (7-15) baina beste era batera. Bigarren zatian, Zugarrondok Temprano ordezkatu du. Hasieran ez da gehiegi aldatu norgehiagoka baina Ederra eta Elorzaren kanporaketa baliatuz Jomi Salerno gerturatzen eta animatzen hasi da, lau goletara murgilduz kontraerasoen bidez. Halere, Ederra, Elorza eta hegaletik Arrojeriak gol bana sartu dute tartea zabalduz. Etxaburuk arnasa eman dio taldeari eta Múgica eta Menéndez bidez bigarren zatiko partziala berdintzea lortu dute (13-13). Datorren asteartean Bera Berak bere aurkaria ezagutuko du, otsailean burutuko diren final-zortzirenetan. Antza zerrendaburuak zehaztuko dira eta EHFko rankinaren arabera Bera Bera zerrendaburu izango litzateke eta teorian talde garrantzitsuenak saihestuko lituzke, besteak beste, Lada eta Rostov errusiarrak, Team Esbjerg daniarra, Errumaniako Brasov, Parisgo Issy, Alemaniako Buxtehuder eta Hungariako Erd. Aitzitik, aurkarik izan daitezke Rocasa, Suediako Höör, Errusiako Astrakhanochka, Danimarkako Team Tvis Holstebro edo Alemaniako Bayer Leverkusen. Fitxa Jomi Salerno 20, Bera Bera 28 Jomi Salerno 20 (7+13): Parini, Coppola (1), Avram (3), Del Balzo (2), Beba (3), Trombetta (5) y Pavlyk (4) –titular- Casale, Benincasa, Lambiase, Lauretti (2) eta Iacovello (o.a.) Bera Bera 28 (15+13): Temprano, Etxeberria (2), Elorza (2), Núñez (2), Menéndez (5), Arizaga (1) y Pinedo (6, 2p) –titular- Ederra (3), Martínez, Arrojeria (2) Múgica (3), Azanza (2), eta Zugarrondo (o.a.). Deialdian, Ziarsolo. Epaileak: Pinar Ünlü Hatipoglu eta Mehtap Simsek (Turquía). EHF delegatua: Sotiris Constantinou (Txipre) Kanporatuak: Casale Jomi Salernotik eta Ederra eta Elorza Bera Beratik Partzialak: 2-2, 3-3, 4-7, 5-9, 6-13, 7-15 –atsedenaldian- 8-15, 11-16, 15-20, 17-22, 19-25 eta 20-28.

23 Azaroa 2014

Hamar goleko abantaila izan arren, Jomi Salernok baino baliabide gehiago duela sentsazio barneratuta izanik ere, Bera Berak ez du gaur erlajaziorik nahi datorren asteartean ospatuko den zozketan egon nahi duelako, hortaz, Palapalumbora berriro irabaztera aterako da 18etatik aurrera.
Etxaburuk minutuak banatu ditu jokalari guztien artean Málagan lehengo asteazkenean eta EHFko joanekoan, ostiralean, donostiarrak nagusi izan ziren norgehiagokan 29-19. Hortaz, defentsan eta erasoan maila ona mantendu nahi du Bera Berak eta jokalariek berriro irabazi nahi du Ana Martínezek zioen bezala “etenaldira joan aurretik ahogozoarekin joateko”.
Horrez gain, Bera Berak alde dauka aurkaria hobeto ezagutzen duela eta bere baliabideak. Jomi Salernok gainera liga berean aritzen den Cassano Magnago taldetik Del Belzo pibote gaztea, jaurtitzeko ia aukerarik ez zuena izan, eta Laura Parini atezaina, oso geldiketa onak egin zituenak. Espaniar nazionalitatea duen argentinarrak antza hiru partida jokatuko ditu hiru egunetan, kanporaketa osoa eta Cassano Magnanorekin Nuoro taldearen aurkako ligakoa.
Benincasak zuzenduta, Jomi Salernok zailtasun handiak izan zituen euskaldunen defentsa gainditzeko. Izan ere, lau jokalarik baino jaurtitzeko aukera izan zuten, Pavlyk (7) eta Coppola (3) hegaletatik eta kanpoko jaurtiketak Beba (5) eta Trombetta (4) internazionala bitartez. Aitzitik, Bera Beraren kasuan jokalari guztiek sartu zuten gutxienez gol bat. Izan ere, Jomi Salernoren defentsak donostiarren barneraketak ezin izan zuen gelditu, batez ere, aurreneko zatian.
Clínicas Rincón eta Jomi Salernoren aurkako lortutako garaipenak konfidantza areagotu du taldean eta minutuak banatu direnez esfortzua ondo neurtuta dago.
Atzo, donostiarrek errekuperazio saioa burutu zuten, arratsaldean Salerno hiria bisitatzeko aukera izan zuten eta igandean goizean aktibazioa egingo dute konzentraturik irteteko arratsaldeko 18etan Palapalumbo pistara. Pinar Ünlü Hatipoglu eta Mehtap Simsek turkiarrek zuzenduko dute partida, oraingo honetan Bera Bera urdinez arituko da.

22 Azaroa 2014

Bera Bera Eskubaloiak urrats handia eman du gaur Salernoko Palapalumpo pistan bertako Jomi (29-19) menperatuz EHFko hirugarren txandan. Bertako talde gisa aritu diren donostiarrak tarte zabala eskuratu dute eta igandean, 18etatik aurrera, leku berean defendatuko dutena. Partidako gakoa defentsan egon da, intentsitate handiz aritu dena eta Italiarren erasoa, Benincasa, Avram eta Beba zuzentzen zutena. Tempranok ondo erantzun dio eskuin hegaletik Pavlyk jokalariari, behin eta berriz saiatu dena Del Belzo piboteak baloirik ikusi ez duelako. Aitor Etxaburuk defentsan 6-0 kokatu du Elorza, Núñez, Pinedo eta Menéndez erdian. Zarauztarrak erasoan Martínezi utzi dio lekua; Arrojeriak zuzentzen zuena Etxeberria hegalean zegoelarik. Bera Bera aise atera da kontraerasora eta Italiarraren defentsan hutsuneak aurkitu ditu Martínez eta Arrojeriaren barneraketak medio (6 min., 5-1), Jomi Salernoren aurreneko hutsartea eraginez. Horrela, partida joan ahala, bere ligan gol gehien sartzen duen Jomi Salernok erasoan zailtasunak zituen eta Bera Beraren abantaila handitzen joan da, Núñez eta Martínezen bitartez. Lehenengo zati erdialdean Etxaburuk talde osoa aldatu du defentsan intentsitatea mantentze aldera kontutan izanda Bera Berak asteazkenean jokatu zuela eta berriro ere igandean egin behar duela. Gipuzkoarrak atsedenaldira 14-7 aurretik, aurkaria baino gehiago dela sentsazioarekin. Bigarren zatian Etxaburuk Zugarrondo jarri du atepean eta partida hasieran aritu den seikotea. Aurreneko minutuetan Bera Berak tartea handitu du, Elorza eta Pinedo bitartez, defentsan ondo jarraitzen zuen, kontraerasora irteten baina eraso posizionalean gehiago kostatu izan zaio. Atezain nafarrak merito handiko geldiketak egin ditu baina Bera Berak ez zituen kontraeraso bideak hain errazak ikusi. Bera Berak 42. minutuan tarterik handiena hartu du (23-10), baina Jomi Salerno taldeak Trombetta eta Pavlyk jokalarien bidez partida amaieran aldea murriztu du. Gipuzkoarrak sentsazio onak berreskuratzen jarraitzen ari dira. Gaur –aktan horrela jaso gabe ego narren- jokalari guztiek gola sartu dute eta minutuak guztien artean banatu dira. Fitxa: Bera Bera 29, Jomi Salerno 19 Bera Bera 29 (14+15): Temprano, Etxeberria (3), Elorza (2), Núñez (4), Martínez (4), Arrojeria (2) eta Pinedo (7, 4p)–titular- Menéndez (1), Ziarsolo (2, 1p), Múgica, Azanza (2), Ederra (1), Arizaga (1) eta Zugarrondo (o.a.). Jomi Salerno 19 (7+12): Iacovello, Pavlyk (7), Avram, Beba (5), Del Balzo, Benincasa eta Coppola (3) –titular- Trombetta (4), Napoletano, Parini (o.a.), Lamberti, Lauretti, Casale, Ferrentino, Lambiase (o.a.), De Santis (o.a.). Epaileak: Pinar Ünlü Hatipoglu eta Mehtap Simsek (Turquía). EHFko Delegatua: Sotiris Constantinou (Txipre) Kanporaketak: Núñez eta Múgica Bera Beratik. Partzialak: 4-1, 6-2, 11-4, 12-4, 14-6, 14-7 –atsedenaldia- 17-8, 21-9, 24-12, 26-13, 26-16 eta 29-19

21 Azaroa 2014

Hegazkina, trena eta autobusa Málagatik Salernora iristeko, uste baino beranduago gainera. Italiako hegoaldean kokaturik, Napolitik 50 kilometrotara, itsasertzean gelditzen den hiri honek 140.000 biztalen ditu. Hotelean eroso gaua pasa ostean, Bera Berako plantillak gaur goizean ordubetez burutu du entrenaldi saioa Palapalumbon, EHF Cupeko hirugarren txanda osoa hartuko duen pista non gipuzkoarrek Jomi Salerno taldea gainditu nahi duen.
Aurreneko aldia da Bera Bera partida ofiziala Italian jokatzen duena eta Maialen Múgica eta Amaia Azanza jokalariek Europako lehiaketan debuta egiteko aukera izango dute. Partida iristeko irrikan dira bata eta bestea eta plantilla osoak bezala gipuzkoarren baliabideak erakutsi nahi dute Italiako txapeldunen aurka.
Clínicas Rincón taldearen aurrean pasa den asteazkenean Málagan egindako partidarekin indarberrituta, Azanzak eta Múgicak onartzen dute partida hori oso ondo etorri zaiola taldeari “sentsazio onak berreskuratzeko, erasoari jarraipena eman eta gure jokua egiteko”. “Disfrutatu” zuen nafarrak minutu asko hegalean izan zituenak eta hiru gol sartu zituena. Zarauztarrak ere pistan minutu asko izan zituen eta “oso gustora sentitu nintzen”.
Amaia Azanzak badaki zer den Champions Leagueko partida batean deialdian egotea. “Oso gaztea nintzen, 20 urte bestetik ez, multzoen faseko partida izan zen Leipzig alemaniar taldearen aurka (2010eko urrian) eta gol batez galdu arren ez dut sekulan ahaztuko bertan egotea eta Championseko doinua entzutea”. Itxakok denboraldi horretan finalera iritsi zen Larviken aurka. Lizarrako jokalariak ez zuen pistara irteteko aukerarik, hortaz, asteburu honetan Europan aritzeko aurkera izango du. “Beste konpetizio bat da eta beste taldea nolakoa den eta jokatzeko irrikan gaude” dio.
Maialen Múgicarentzat Europan lehenengo esperientzia izango da. “Iritsi da eguna, zure herrian hasten duzuenean ez dakizu noraino iritsiko zara eta niri ilusio handia egiten dit” onartzen du. “Kanporaketak pasatzea sentsazio onak utziko ditu eta gero ikusiko dugu noraino iristen garen” adierazi du zarauztarrak. Jomi Salernoren inguruan diote lehenego lerroko jokalariak direla aipagarrienak. Halere ere biek bat egin dute “gure jokua eginez gero, kanporaketa gainditzeko aukera asko izango ditugu”.
Pinar Ünlü Hatipoglu eta Mehtap Simsek Turkiako bikoteak bi partidak zuzenduko dituzte. Aurreneko hitzorduan, gaur arratsaldean 20etan Bera Bera bertako talde gisa arituko da eta bigarren norgehiagoka igandean 18etan ospatuko da leku berean.
Partida @BalonmaBeraBera twitterrean jarrai daiteke kontuan.