04 Urria 2011

Mar Alicante taldearen aurkako partida jokatu ostean, Bera Bera Eskubaloiko Dara Carvalho eta Antonella Mena piboteak Brasil eta Argentinako selekzioekin joango dira Mexikora, Guadalajara hirian urriaren 15etik 24ra bitartean ospatuko diren Joku Panamerikarrak jokatzeko. Deialdi honen ondorioz, Reyes Carrerek ezin izango ditu erabili Leonen urriaren 15eko partidan. Hurrengo asteburuan ligak berriro ere etenaldia izango du urriaren 29ra arte, Bera Bera Eskubaloiak Porriño taldearen aurka Bidebietan jokatuko du orduan.

04 Urria 2011

Jorge Dueñas selekzionatzaileak ezagutzera eman du gaur arratsaldean 2012an ospatuko den Europako Txapelketa jokatzeko sailkapen fasean Espainiak jokatu behar dituen bi partidarako deialdia. Oraindik itxita ez dagoen zerrendan Eli Pinedo agertzen da, ez ordea, Bea Fernández. Kantabriarrak ostegunerarte zain egon beharko du, Dueñasek 16 fitxa betetzeko bi jokalarien izenak iragartzen duen arte, alegia. Pinedok urriaren 17an Leganesen egon beharko du, Espainiak bertan jokatuko baitu Islandiaren aurka ostegunean. Ostiralean, berriz, Ginebrara egingo dute bidaia eta Genovatik gertu dagoen Thonex hirian Suizaren aurka jokatuko dute igandean.

03 Urria 2011

Bera Bera Eskubaloiak hiru jardunaldietan 99 gol lortu ditu -39 Kukullagari, 26 Itxakori eta 34 Gijoni-. Eider Rubio zentrala eta Melinda Berta eskuin hegala dira 17na golekin golegile nagusienak. Gainera, partida guztietan ondo aritu dira. Izan ere Eider Rubiok Kukullagari eta Itxakori seina sartu zizkien eta Gijoni, bost. Melinda Bertak, aldiz, sei bizkaitarrei, zazpi txapeldunari eta lau pasa den larunbatean.

Ondoren, Anna Punko agertzen da 13 golekin eta Matxalen Ziarsolo eta Eli Pinedo ezker hegalak hamaikana golekin. Dara Carvalhok 10 gol sartu ditu eta Bea Fernandezek, 9.

Sailkapenean, hirugarrenak

Hirugarren jardunaldiak estutu egin du sailkapena. Itxakok eta Bera Bera Eskubaloiak izan ezik, gainontzeko taldeek irabazteko zailtasunak izan dituzte. Liderrak adina puntu dituen Mar Saguntok gol batez irabazi zion Alcobendasi (30-29), Cleba Leonek, berriz, Kukullagari hiru golez irabazi zion. Eta ustekabeak ere eman dira: Elche eta Elda Prestigioren arteko berdinketa eta, batez ere, Castro eta Porriñoren garaipenak Rocasa eta Ucam Murciaren aurrean, bi partida emaitza bera izan zutelarik, 22-21.

Jardunaldiak denboraldiaren parekotasuna iragartzen du. Bera Bera Eskubaloia hirugarrena da Ucam Murcia, Rocasa eta Elda Prestigiok baino gol average delakoa hobea duelako.

Larunbatean, Bidebietan (7etan), Bera Bera Eskubaloiak Mar Alicante izango du aurrean, Itxakoren aurka 20-29 galdu zuen taldea. Aurreneko jardunaldian Mar Alicantek Ucam Murciaren aurka galdu zuen etxean eta ondoren, Kukullagari 21-33 irabazi zion.

Reyes Carrerek ohiko astea planfikatu du. Gaur goizeko entrenamenduan ez da ezer berezirik eman, bihar goiz-arratsaldez; etzi, arratsaldez eta ostegun eta ostiralea, goizez.

01 Urria 2011

Bera Bera Eskubaloiak, Balonmano Feve bertako taldearen aurrean (15-34), defentsan eta eraso eraginkorrean oinarritutako garaipen zabala lortu du gaur arratsaldean Gijonen. Minutuak joan ahala, bi talde hauen tartea gero eta handiagoa zen. Hasierako 1-6 partzialak zama handiegia izan da Gijongo jokalarientzat eta debuta egin duen Jose Manuel Noval entrenatzailearentzat. Hasiera hasieratik Bera Bera Eskubaloiak asturiarrei defentsa gainditzea zaila izango zutela erakutsi baitie. Gainera, Darly Zoqbi atezaina bikain aritu da. Reyes Carrerek jarritako 5-1 defentsa emaitza onak eman ditu eta tartea zabaldu du: 4-9, 15. minutuan, atsedenaldia iritsi aurretik partida erabakita uzteko (7-16). Etxeko erasoa oztopatzeaz gain donostiarrek kontraeraso zitalak gauzatu dituzte. Bigarren zatiak aurreneko gidoia jarraitu du. Defentsa, orain 6-0, horma bat zen asturiarrentzat eta markagailuak bide bera hartu du: 8-22, 40. minutuan eta 13-18, 50. minutuan. Reyes Carrerek minutuak banatu ditu bere jokalarien artean eta golegile nagusienak Matxalen Ziarsolo (6), Punko, Rubio eta Dara Carvalho bostna golekin izan dira. BM FEVE Gijón 15 – Bera Bera 34 Gijón (7+8): Esteban eta Mirca, Gonzales, de la Heras 1, Lozano, Tejeda, Martínez 2, Noemi Fernandez, Pop 5, de Ponga, Torreiro 1, García 1, Arrizabalaga, Lastra, López Martín 4, Simón 1 Bera Bera (16+18): Zoqbi eta Yamiley, Berta 4, Punko 5, Rubio 5, Carvalho 5, Bea Fernández, Pinedo 3, Campa 3, Cuña 2, Ziarsolo 6, Altuna 1, Mena y Arizaga. Epaileak: Martín Rodriguez eta Daniel Portela Partzialak: 1-2, 1-6, 4-9, 5-11, 6-11, 7-16; 8-19, 8-22, 11-24, 13-28, 13-32, 15-34