SUPER AMARA Bera Berako hiru jokalarik egindako Covid 19ko frogetan positiboa eman dute. Batek ez du gaixotasunarekin lotutako sintomarik eta beste biek oso modu urrian, ondorioz, hirurak ondo daude eta etxean isolatuta.
Sintomak zituztela konturatuta hiru jokalari hauek ez ziren asteleheneko entrenaldira joan. Horri esker, gainontzeko jokalariekin izandako azken kontaktua abenduaren 31ko goizean izanda eta sintomak antzeman zituzten egunean 72 ordu baino gehiago igaro zirenez, Osakidetzaren iritziz taldekideak ez ditu gertuko kontaktutzat hartu, ondorioz, berrogeialdia ez dute bete behar. Halere, klubak Osakidetzarekin izandako solasaldiaren ondorioz, plantilla osoak PCR testak egin ditu, taldean fokua dagoela saiheste aldera. Jokalari guztiek negatiboak eman dutenez SUPER AMARA Bera Bera entrenaldietara itzuli da. Pandemia hasi denetik aurreneko aldia da plantillan Covid 19ko positibo kasuak agertzea.
Horrez gain, Imanol Álvarezek itxialdian jarraitzen du kasu positiboa gertu duenez. Gaur egindako PCR testaren erantzunaren zain dago baina, irizpideei erreparatua, urtarrilaren 18ra arte konfunaturik jarraitu beharko du ermuarrak.
SUPER AMARA - Lanzarote Arrecifek atzeratuta
Testuinguru honetan, Covid 19arekin hiru jokalari izan arren, SUPER AMARA Bera Berak ezin du partida atzeratzea eskatu (Gascan urtarrilaren 16koa), horretarako Federazioak bost kasu positibo eskatzen dituelako. Halere, Cicar Lanzarote Ciudad de Arrecife taldea izan zen norgehiagoka hori atzeratzea eskatu duena, izan ere, jokalari batek Covid 19an positiboa eman du, gurean ez bezala, gainontzeko taldekideekin harreman estua izan duena, gainera. Hortaz, PCR testak egin dituzte, negatiboak guztiak, baina hamar eguneko itxialdia bete beharko dute, Donostiara egin behar duten bidai egunean amaitzen dena. Espainiako Eskubaloi Federazioak onartu du eskaera, ondorioz, bi taldeek ostiralera arte epea dute data berri bat adosteko.
