Guerreras Iberdrola ligako bi partida baino ez dira jokatu irailaren 11n lehiaketa hasi zenetik. Selekzio ezberdinek sortutako etenaldia bi asteko jarduera osatu ostean, SUPER AMARA Bera Bera ez da geldituko azaroaren 22ra arte.
Liga, Superkopa eta European Handball League berria donostiarren egutegian ageri dira. Urriaren 10ean, larunbatean, SUPER AMARA Bera Bera Lanzarotera itzuliko da, oraingo honetan, Lanzarote Puerto del Carmen taldearen aurka jokatzera Tías udalerrian (18etan Donostiako ordutegian). Guerreras Iberdrola ligako laugarren jardunaldian, donostiarrek Josean Gascan egungo Kopako txapelduna hartuko dute, Rincón Fertilidad Málaga, alegia. Urriaren 18an igandean izango da 12:10etan ETB1 zuzenean delarik.
Urriaren 20an, Vienan egingo den European Handball Leagueko zozketa adi jarraituko du SUPER AMARA Bera Berak. Datozen bi asteburuetan bigarren txandako bost kanporaketa jokatuko dira eta donostiarrak hirugarrenean sartuko dira, azaroaren 14 eta 22ra bitartean ospatuko dena eta multzoen fasera sailkatzea dakarrena.
Europari heldu aurretik, SUPER AMARA Bera Berak ligako norgehiagokak eta Superkopa izango ditu hizpide. Urriaren 24n (18etan) Uneatlático Pereda izango da Donostian bisitari eta, ostean, Superkopa. Kopako aurreneko kanporaketa izanik, Espainiako Federazioak urriaren 31n (18etan) kokatu du finala Málagako Ciudad Jardín kiroldegian, SUPER AMARA Bera Bera 2019-20 ligako txapeldunak eta Rincón Fertilidad Kopako txapeldunak hitzordua dutelarik.
Zubileta Evolution BM Zuazoren aurkako derbia seigarren jardunaldian iritsiko da. Lasesarren izango da azaroaren lehen asteburuan. Eta ziur aski Aula Alimentos de Valladolid taldearen aurkako partida azaroaren 11ra aurreratuko da, lehen itzuliko azkena, izan ere SUPER AMARA Bera Berak European Handball Leagueko kanporaketari helduko dio azaroaren 14tik. Hau da, Europako bi partiden artean gipuzkoarrek ez dute ligako jardunaldirik izango.
Ondorioz, bi asteko etenaldia ostean, SUPER AMARA Bera Berak azaroaren 22ra arte, sei astetan, zortzi partida jokatuko ditu: Ligako bost, Superkopa eta European Handball Leagueko kanporaketa.
