super amara Bera Berak Replasa Beti Onak hartuko du bihar, asteazkena (19etan), Bidebietan, larunbatean Alemanian jokatuko den European Leagueko partida dela eta, 14. jardunaldia aurreratu da. Imanol Alvarezek “Europako inertziarekin” jarraitu nahi du, “dinamika horretan sartuta (asteazkena-asteburua) ez baitago pentsatzeko denbora askorik”.
Partidak beste osagai berezia du. super amara Bera Berak partida ofiziala jokatuko du berriro Bidebietan. IDK Euskotren Europako kanporaketa du Gascan eta Grafometal La Riojak ez zuen aintzat hartu Donostiako taldeak partida biharko egunera aurreratzeko egindako eskaera. “Aspaldian ez dugu Bidebietan jokatu (2020ko martxoaren 7an, alarma-egoera baino astebete lehenago), eta kontuan hartu beharreko faktorea da”, entrenatzaile ermuarraren iritziz. “Astean bitan entrenatzen gara hemen; alde batetik, polita da hainbeste aldiz jokatu dugun zelaira itzultzea, baina, bestalde, dinamika berriro aldatzen duen zerbait da, eta espero dut guri ez eragitea”.
Alvarezek onartu du taldea “pozik eta gogotsu” dagoela Paris 92ren aurkako garaipenaren ondoren. Aldiz, “entrenatzaileok biharko partida ere garrantzitsua dela azpimarratzen ari gara, batzen jarraitzeko, gainerakoek ere hala egiten baitute”. “Larunbatean ondo egin genituen gauzei buruz hitz egin dugu, asteazken honetan errepikatzen saiatzeko”, gaineratu du.
super amara Bera Berako entrenatzaileak bere taldea “gaitasunarekin eta zentratua” ikusten du. “Hasieran martxa ona sartzen badugu, despisterik gabe, aukera asko izango ditugu”, adierazi du. “Denok nahi dugu Europako fasea jokatu, bagenekien tartean horrelako partidak etorriko zirela, baina Europan lehiatzeko modurik onena aste barruan ondo jokatzea da”. “Partida ofiziala da – jarraitzen du –, aurkari gogorra eta jokatzeko erronka interesgarria. Taldean dauden 16 jokalariak jokatzeko prest daude, eta denek nahi dituzte minutuak ”. Ildo horretan, “kargak eta atsedena kontrolatzearen” garrantzia azpimarratu du, “dakiguna ondo egitea eta fresko egotea ezinbestekoa delako”.
Replasa Beti Onak-i buruz galdetuta, Alvarezek adierazi du “gauzak ondo egiten dituela, oso zorrotz”, eta ohartarazi du “beti sortzen dizkigutela arazoak”. Joan den larunbatean bere pistan galdu zuen Grafometal La Riojaren aurka, eta, bere ustez, “zaila izango da, minduta etorriko baitira porrot horregatik”. Entrenatzaileak “play-offa jokatzeko hautagaien artean” ikusten du Beti Onak.
Jordi Pinilla eta Eric Deiros katalanek zuzenduko du derbia.
