super amara Bera Bera eta Replasa Beti Onak taldeek, Lyndie Tchaptchet eta Olaia Luzuriaga jokalarien bitartez, abuztuaren 30ean (ostiralean) jokatuko duten Guerreras Iberdrola Liga irekiko duen partida aurkeztu dute Etxeberriko Lacturaleko Interpretazio Zentroan, Atarrabiako Indurain anaiak izeneko kiroldegian burutuko dena (21etan TDP).
Bi jokalariek bigarren denboraldia dute egungo taldean. Irribarre konplizeak trukatu dituzte Juanma Garro Lacturaleko presidentearekin, denboraldi berri honetarako “bi taldeei zorterik onena” eman nahi izan diena eta “ostiralean berdinketa” eskatu duenean.
Gipuzkoarren eta nafarren arteko norgehiagoketan super amara Bera Berak garaipen argiak lortu dituen arren, Lyndie Tchaptchetek ohartarazi du ostiraleko partida “arriskutsua eta zaila dela, ikusleek asko estutzen dutelako Atarrabian eta gure taldearentzat oraindik moldaketa prozesuan dago lehen partida ofiziala delako”. super amara Bera Berak ere bere zaleen animoak sentituko ditu, partidaren ordua onena izan ez arren, 50 sarrera inguru eskatuko baitizkio Beti Onaki. Pibota nafarrak bigarren denboraldia du Donostian, eta bertan hirukoa lortu zuen iragan denboraldian. Balentria hori errepikatzea “zaila izango da, baina berriro saiatuko gara”.
Bestalde, Olaia Luzuriagak “ilusioa eta gogo handia” ditugu ligan debutatzeko eta “etxean gainera”. Replasa Beti Onak oso aldaketa gutxi izan ditu iazko plantillarekiko, ondorioz “lan horri jarraipena eman behar diogu aurten”. “Orain erritmo hartzea falta zaigu eta sentsazioak hobetu”. Super amara Bera Beraren inguruan adierazi du “iaz titulu guztiak irabazi zituen eta partida osoa jokatuko duela uste dugu, abiadura da bere indargunea baina guk ere gure lanean sinisten dugu eta irabazteko gai garela uste dut”.
Atezianak uste du Replasa Beti Onak taldea “lehen zortzien artean sailkatu daitekeela berriro titulurako play-offa jokatzeko”, eta helburua udaberrian “Erreginaren Kopako azken fasea jokatzea dela”.
Sarrerak, helduentzat 15eurotan, eskuragarri daude eta, horrez gain, arratsaldean, bi taldeetako kadete neskek lagunartekoa jokatuko dute.
