super amara Bera Berako entrenatzaile Imanol Alvarezek uztailaren 26rako deitu du bere plantilla, 40 eguneko denboraldiaurreari ekiteko, lehen partida ofizialera ahalik eta ondoen iristeko, iraileko lehen asteburuan Guerreras Iberdrola Ligari dagokiona.
Lagunartekoei erreparatuz, Super amara Bera Berak izaera frantsesa izango duen denboraldiaurrea prestatu du, izan ere, erdiak Frantziako taldeen aurka jokatuko baitu eta, bestetik, Gipuzkoan hiru lagunarteko jokatuko ditu. Guztira, zortzi partida jokatuko dituzte donostiarrek, lehenengoa Gascan, abuztuaren 4an (18,30etan) Chambray talde frantziarraren aurka, Energie Butagaz Ligako laugarren sailkatua, eta, beraz, baliteke super amara Bera Berarekin bat egitea European League-n. Chambrayk astebeteko stage bat egingo du Donostian.
Bigarren lagunartekoa Capbretonen izango da, abuztuaren 11n, eta aurkaria Paris 92, European Leagueko multzoen fasea jokatu arren, zazpigarren geratu dena bere ligan.
Abuztuaren 13an igandean, Orion izango da hitzordua (12etan) eta aurkaria, Rocasa. Aurten, Egiako Torneoa Aste Nagusian kokatu dute. Abuztuaren 16an izango da, Beti Onak taldea izango da talde gonbidatua. Asteburu horretan, super amara Bera Berak txapelketa baten parte hartuko du Merignacen. Ostiralean (20,30etan) Spuc Handball Pessac izango du aurkari, Frantziako D2ra igo berria, eta larunbatean Merignac – D2-ra jaitsi da – edo CAB Handball.
Amaitzeko, abuztuaren 25ean, ostirala, eta 26an, larunbata, V. Summer BAG txapelketa jokatuko du, Caja Rural Aula Valladolidekin eta Mecalia Atlético Guardesekin batera antolatutakoa. Irailaren lehen asteburuan hasiko da Guerreras Iberdrola Liga (oraindik ez dugu zozketaren berri) eta bigarren asteburuan, iberiar Superkopa (lekua ezagutzeke).
Argazkian, iaz Celles sur Bellen txapelketan Ikast Handball taldearen aurkako lagunartekoa
