Zubileta Evolution BM Zuazok eta Espainiako Eskubaloi Federazioak super amara Bera Beraren eskaera onartu dute, ondorioz, derbia apirilaren 15ean jokatuko da, larunbata, 13etan, Josean Gasca kiroldegian, Guerreras Iberdrola Ligako liga erregularreko azken jardunaldiko partidari dagokiona.
Federazioak erabakita, ligako azken bi jardunaldiak ordutegi bateratuan jokatu behar dira, hau da, larunbatetan 19etan. Bihar, Telden, ez da araua beteko telebistak ematen duelako norgehiagoka, baina gainerako partidak ordu horretan jokatuko dira. Azken jardunaldiari begira (apirilaren 15ean, 19etan), kasualitatez emakumezkoen saskibaloiaren liga erregularra ere egun horretan bertan amaitzen da eta, horrez gain, IDK Euskotren eta super amara Bera Bera taldeak etxean koinziditzen dute.
super amara Bera Bera eta Zubileta Evolution BM Zuazoren arteko partidak sailkapenean eraginik ez duenez, talde donostiarrak apirilaren 16rako, 12etan, erreserba egin zuen Gascan, talde bizkaitarraren baimenarekin eta Federazioari horren berri emanez. Asteburu honetan, berriz, jardunaldi baten faltan, Mundaiz hockey-klubak gizonezkoen Iparraldeko Liga irabazi du, eta igoera fasea antolatzeko aukera izango luke igande horretan (apirilaren 16an) Gascan. Hori dela eta, Bera Berak larunbatean 13etan finkatu du derbia, Zuazori une oro erakutsitako erraztasunak eskertuz.
Euskal Kopa, apirilaren 12an
Bestetik, NAIBC San Adrian taldearen aurka jokatuko du super amara Bera Berak Euskal Kopako finalaurrekoetan, partida bakarrera. Bilboko Recalde kiroldegia izango da apirilaren 12an, 20,30etan. Bizkaitarrek Zilarrezko B multzoan bigarren izateko aukeraz dituzte liga amaitzeko bi jardunaldi gelditzen direnean. Espainiarekin eta Brasilekin arituko diren Etxeberria, Arrojeria, Arcos eta Fernandes jokalariak baja izango dira super amara Bera Beran.
Ondorioz, apirilean gutxienez bost partida jokatuko ditu super amara Bera Berak. Bihar Telden, apirilaren 12an Bilbon, 15ean Gascan derbia, Malagan Atticgo Elche taldearen aurkako final-laurdenak (apirilaren 21etan 18etan) eta apirilaren 29an ligako final-laurdenetako joanekoa ligako zortzigarren sailkatuaren aurka.
