Derbiak Lasesarren urdin koloreari eusten jarraitzen du, gaurkoan SUPER AMARA Bera Berak erakustaldia eman du bigarren zatian Zubileta Evolution BM Zuazo (20-31, 11-9 atsedenaldian) gaindituz, ondorioz, bigarrenarekiko puntu bat gehitu du, orain Costa del Sol Málaga zazpi puntura kokatu delarik.
SUPER AMARA Bera Bera Fernandesen bajarekin iritsi da Barakaldora, kalez jantzita brasildarra, ostiralean buruan jasotako kolpe latza dela eta egun batzu geldirik egoteko agindu zion medikuak. Korrikaren 22. edizioa gaur goizean Donostian amaitu da eta euskararen aldeko ekimena aintzat hartuta Etxeberriak markagailua inauguratu du kontraerasoan. Aurreneko zatiak gol gutxi izan ditu, defentsak nagusi zirelako. Hasieran donostiarrek menperatu dute lehia, Cesáreok pibotan jaso du eta Boadak, kontraerasoan, SUPER AMARA Bera Bera aurreratu du (8’: 2-4).
Halere, hurrengo minutuetan akatsak iritsi dira, baloiak galduz edo Ezbida atezainarekin topo egin dute gipuzkoarrek. Ondorioz, Zubieta Evolution BM Zuazok hutsuenak aurkitu ditu donostiarren defentsan, Isabel Fernández-Agustí pibotan, Alba Sánchezek ondo gauzaturiko penaltiak lortuz. Hamabi minutu gola egin gabe bizkaitarrek tartea ireki dute (7-4).
Álvarezek hutsartea eskatu zuen, Aalla geldiketak egiten hasi zen, Hernándezek, penatiz, abantaila murriztu du, Boadak barneraketa egin du, Menéndez kontraerasoan eta Arrojeriak berdidu du derbia. Halere, Ezbidak saihestu ditu kanpotarren saiakerak eta Encina, Paula García eta Alba Sánchez jokalariek Zuazo aurretik kokatu dute atsedenaldira iritsi aurretik (11-9).
Bigarrenean, Zubileta Evolution BM Zuazok sei metroak hizpide izan ditu Isabel Fernández-Agustí jokalariari esker. Loidi eta Cesáreo erdian, defentsak intentsitatea handitu du, elgoibartarrak hutsunea aurkitu du gola egiteko, Cavok barneraketa egin du eta Arrojeriak –bikain bigarren zatian taldea zuzentzen- bizkaitarren defentsa zulatu du.
Fernández-Agustík baloiak jasotzen jarraitu du, Loidi kanporatu dute baina Zuazok ez du aprobetxatu, alderantziz. 14-13 aurretik zela, Zuazok ez ditu erasoak ondo kudeatu, Aallak Sarrionandia-Ibarraren jaurtiketak gelditu ditu, Etxeberriak kontraerasoan egin du gola –jaurtitutako seirak gauzatu ditu -, Hernándezek penaltia sartu du (6/6), eta bat gutxiago egon arren SUPER AMARA Bera Bera aurretik jarri da. Gipuzkoarrak geldiezinak ziren. Menéndezek kontraerasoan asmatu du, Cavok barneraketa egin du eta Hernándezek, zazpi metroetatik bikain, kanpotik ere jaurtitzen dakiela erakutsi zuen. Aallak Encinaren penaltia gelditu du, Arrojeriak Ezbida gainditu du eta Etxeberria hiru kontraeraso jarraitan gauzatu ditu.
Ondorioz, 2-12 partziala partida erabat apurtzeko, Rodríguezek eskaturiko hutsarteak saihestu ez zuena. Ariadna González atera zen, Imanol Álvarezek minutuak banatu zituen, partida eroso zegoen donostiarrentzat eta O’Mullonyk eta Ugartemendiak golak egin dituzte.
Hortaz, 19. Garaipena Ligan Aste Santu bezperan, halere, bihar izan ezik ez dute oporrik izango jokalariek, izan ere, larunbatean, apirilak 16, 12etan Gascan, Mecalia Atlético Guardés izango baita bisitari Gascan.
Fitxa: Zubileta Evolution BM Zuazo 20, SUPER AMARA Bera Bera 31
Zubileta Evolution BM Zuazo 20 (11+9): Ezbida, Sarrionandia-Ibarra, Bengoetxea (2), Berasategi, Permach (1), M. Fernández-Agustí (2) eta Velasco –hasierako zazpikoa- Sánchez (5, 3p), I. Fernández-Agustí (4), Encina (2, 1p), García (2), Erauskin (1), Arozamena (1) eta González (o.a.)
SUPER AMARA Bera Bera 31 (9+22): Aalla, Etxeberria (6), Cavo (3), Cesáreo (2), Boada (2), Hernández (8, 6p) eta Gil –hasierako zazpikoa- Menéndez (2), Arrojeria (4), O’Mullony (2), Ugartemendia (1), Polonio, Moreno, Loidi (1) eta Silva (o.a.)
Epaileak: Oyarzun eta Zaragueta (nafarrak)
Kanporatuak: Bengoetxea Zuazotik eta Etxeberria eta Loidi SUPER AMARAtik
Partzialak: 2-2, 3-4, 4-4, 7-4, 8-7, 11-9 –atsedenaldia- 13-12, 15-15, 16-19, 16-22, 17-27 eta 20-31
Gertaerak: Laura Hernándezek 20. Jardunaldiko Guerrera Iberdrola saria jaso du. Zuazok opariak eman dizkie Maddi Aallari eta June Loidiri eta bi taldeek Korrikaren 22. Edizioarekin bat egin dute.
