Liderraren aurkako garaipena eta dagoeneko seigarrena jarraian SALTO Bera Berarentzat, taldeak baja ugariei aurre egiten jakin zuen eta partida serio bat planteatuz azken unera arte garaipena lortu zuen eraginkorra izan zen Adein Tenerife Fundación CBCren aurka. Bidebietan giro bikaina egon zen, harmailak beteta eta atsedenaldian auzoko inauterien animazioarekin.
Partida bi taldeen arteko lehia estuarekin hasi zen, etengabeko joan-etorriarekin. Gontxi, Yisus eta Asjaden bajek Iker Iglesiasi taldekide guztien laguntza behar izatea ekarri zuten, eta hauek maila bikaina erakutsi zuten. Horren erakusgarri, lehen laurdenaren amaieran 18-12ko abantaila lortu zuten konfiantza hartzeko.
Bigarren laurdenean partidaren erritmoa egonkortu egin zen, saskiratze portzentajeak jaitsi ziren, baina defentsa-sistemak hobeto antolatu ziren eta talde kanariarrak markagailuari buelta eman zion, 26-29ko emaitzarekin amaituz. Atsedenaldian, auzoko konpartsen ikuskizunak eta harmailak betetzen joateak gure jokalariei bultzada gehigarria eman zien.
Atsedenaren ostean, Tenerife talde liderrak zergatik dagoen sailkapenaren buruan erakutsi zuen, eta markagailuan alde handia lortu zuen. Hala ere, Iker Iglesiasek eskatutako hutsarte pare batek eta batez ere aulkiko jokalarien ekarpenak –karakter handia erakutsiz– SALTO Bera Berari markagailuari buelta emateko aukera eman zioten. Hirugarren laurdena 40-39ko emaitzarekin amaitu zen.
Azken laurdena bihotz-ahulentzako ez zen izan: alde txikiak, berdinketak, jaurtiketa libre erabakigarriak... Azkenik, ausardiari eta borrokari esker, Iker Iglesiasek zuzendutako jokalariek 54-50eko garaipena lortu zuten. Hirugarren postuan jarraitzen dute, 20 punturekin, eta datorren astean Fundación Zuzenak taldearen aurkako derbian Vitorian postua sendotzeko aukera izango dute.
