ISO 9001 ziurtagiria eman dio SGSk Bera Berari, kudeaketa txalotuz

SGS International Certification Services enpresako lurraldeko zuzendari Jon Ander Madariagak Bera Bera Eskubaloiko arduradun Tati Garmendiari ISO 9001:2008 ziurtagiria eman dio gaur goizean, taldearen kudeaketak nazioarte mailako arau honek ezartzen dituen baldintzak betetzen duela egiaztatzen duen agiria, hain zuzen.
Denboraldiko planifikazioa ez ezik, eskubaloi partidak antolatzen ere eskuratu du aitortza, agiriaren esparrua finkatuz. Grupo Gismaren gidaritzapean, kudeaketa sistemak urtebeteko epea behar izan du martxan jartzeko. Ziurtagiriak adierazten du Bera Bera Eskubaloiak prozesuak identifikatuta dituela, ardurak ere bai, adierazleak finkatzen ditu prozesuak eraginkorrak diren jakiteko eta bezeroen arreta jartzen du.
Horrez gain, kirol helburuaz gain bestelako asmoak finkatzen ditu Bera Bera Eskubaloiak eta sistemaren hobekuntza du hizpide. Auditorian, SGS enpresak zoriondu zuen Bera Bera araua bere beharretara moldatu zuelako eta horrez gain harrituta gelditu zen batez ere Champions Leagueko partidek sortzen duten lan izkutuarekin eta, orokorrean, goi mailako talde baten kudeaketak exijitzen duenarekin.
Gaurko agerraldian, Jon Ander Madariagak “aholkuak” eman dizkio Bera Berari, “orain bezala lanean jarraitzeko, gauzak ondo egiteko ohiturari heltzeko eta epe luzera begiratzeko”.
Bestetik, Tati Garmendiak adierazi du “ISO 9001:2008 ziurtagiria eskuratzea ezohikoa da kirol taldeetan, Bera Berak kudeaketari arreta berezia jartzen dion seinale”.
Grupo Gismako gerente Gorka Sedanok azaldu du “kalitate sistemaren inplantazioan garrantzitsuena da prozesuak ezartzea eta etengabeko hobekuntza sustatu nahi duen taldea osatu”.
Azkenik, Gipuzkoako Foru Aldundiko Kiroletako zuzendari Asier Sarriegik adierazi du “ziurtagiria harro egoteko beste arrazoi bat da”. Era berean aipatu du “Gipuzkoa historikoki lehenengo lurraldea izan da kirol erakundeen kudeaketan kalitatearen aldeko horrelako apustuak sustatzen” eta horren adibidideak dira 87 erakunde direla kudeaketa hobetze aldera neurri ezberdinetako konpromisoak hartu dituztela”, horien artean Bera Bera R.T. kluba osoa.
Argazkian, Jon Ander Madariaga, Tati Garmendia, Asier Sarriegi eta Gorka Sedano.