Valladolid, 19 urte eta gero
Denboraldiko ezustea izan da, ohorezko mailara igo berri den taldeari gol bakarra falta izan zitzaion Kopan egon ahal izateko eta gaur egun bere erronka da Europa jokatzeko aukera ematen duen bostgarren postua. Valladolideko Aula Cultural Viveros Herol taldea da, zazpigarrena sailkapenean, Elche Mustang puntu bakar batera du eta BM Porriño lau puntura.
Jaitsiera postuak birtualki uxatuta, bere helburua lehiaketarekin gozatzea da eta Europako postuak lortzeko lehian egon. Gainera, datorren larunbateko partida (18etan) Miriam Blasco kiroldegian Bera Bera hartuko duten egunean, klubari laguntzeko eguna izendatu dute eta eskubaloi nahiz kirol zalegoa deitzen hasi dira.
Ondorioz, Bera Bera Valladolidera itzuliko da 19 urte pasa ostean. Bertan lau partida jokatu ditu, bi garaipen, berdinketa bat eta porrot bakarrarekin. Garako kazetari Juan Carlos Elorzak jaso dituen datuen arabera gipuzkoarrek Valladoliden jokatu zuten lehen partida 1991eko martxoan izan zen, ohorezko mailan aritzen ziren aurreneko denboraldian, alegia. Final bailitzan, puntuak beharrezkoak ziren jaitsiera postua saihesteko. Eta 15-21 irabazi zuen Bera Berak bertako taldearen kaltera.
Valladolideko Unibertsitateak ohorezko mailan lekua segituan berreskuratu zuen eta 1992ko azaroan Bera Berak berdiketa baino ez zuen lortu (18-18).
Eta hurrengo urtean, 1994ko otsailean, Bera Berak 24-21 galdu zuen Valladoliden baina 1995eko martxoan 22-32 irabazi zuen.
