Alcobendasek Kopa hartuko du martxoaren 13tik 16ra bitartean

Alcobendas hiriak hartuko du martxoaren 13tik 16ra bitartean Kopako XXXV. edizioa Espainiako federazioak, Balonmano Alcobendas kluba, Udala eta Madrilgo Komunitateak adostu duten hitzarmena medio. Lehiaketa honi begira Bera Bera eta Helvetia Alcobendas izango dira zerrenda buruak zozketan, izan ere, lehenengo itzuli amaieran sailkapenean lehenengo eta bigarrena izanik, ondorioz, donostiarrak balizko finalean baino ez dira madrildarrekin topo egingo. Zozketan (ez dago zehaztuta noiz den) izango dira Rocasa, Mecalia Atlético Guardés, BM Porriño, Elche Mustang, Zuazo Barakaldo eta Mar Alicante. Horrela, final-laurdenak (martxoaren 13an edo 14ean) Amaya Valdemoro eta Pabellón de los Sueños kiroldegietan ospatuko dira, azken hau Helvetia Alcobendasen ohiko pista. Era berean, final-erdiak (martxoaren 15ean) eta finala (martxoaren 16an) Amaya Valdemoro kiroldegian burutuko dira, 2.300 lagunentzako lekua duena.