Bolada zoragarria

Aurtengo Bera Bera Eskubaloiak markak ezarriko ditu. Azaroaren 5ean Elxen galdu ostean, itzuli oso bat garaipenak bestearen atzetik lotu ditu, hau da, ligako talde guztiak mendean hartu ditu Grupo Asfi Itxako liderra izan ezik.

Azaroaren 9tik gaur arte 13 partida jokatu ditu, 12 irabaztea lortu ditu eta bakarra galdu du, Bidebietan urtarrilaren 31n, partida guztiak irabazi dituen Itxakoren aurka (26-27). Hori dena, jakina, emakumeen eskubaloiko sailkapenean antzeman egin da. Donostiarrak Europako kopa postuetan daude kokaturik, nafarren atzetik.

Eta hirugarren taldea Mar Saguntorekiko tartea lau puntukoa da, sei ateratzen dizkio laugarrenari –BM Alcobendas- eta zazpi bostgarrenari –Mar Alicante-. Reyes Carrereren jokalariek bikain egin dituzte etxeko lanak, batez ere, Sagunton (21-25) eta Alacanten (23-25) lortutako garaipenak azpimarragarrienak dira eta aipaturiko Itxakoren aurkako norgehiagoka izan ezik Bidebietan puntu guztiak irabazi dituzte.
 
Sagunto-Itxako eta Castro Urdiales-Bera Bera

Esan beharra dago, era berean, arerioek izandako hutsak aprobetxatu dituela Bera Berak. Esate baterako azken jardunaldian, Kukullagak Mar Sagunto gainditu du 33-32, BM Alcobendasek puntu bat urratu zuen Murtzian eta Alicantek Porriñoren aurka galdu zuen etxean.

Datorren asteburuan, gainera, tartea gehiago zabaldu lezake Bera Berak, Mar Saguntok Europatik kanpo gelditu den Itxako hartuko baitu eta donostiarrek jaisteko postuetan kokaturik dagoen Castro Urdialesi egingo diote bisita. Larunbatean arratsaldeko 7etan hasiko dira bi partidak.

Aipatutako azken 13 jardunaldi hauetan Bera Berak zazpi partida jokatu ditu Bidebietan: Castro Urdiales (33-22), BM Alcobendas (36-25), Elda Prestigio (25-22), Itxako (26-27), BM Gijón (38-18), Cleba León (31-24) eta Elche-Mustang (30-25). Bestetik,

Donostiatik kanpo partida guztiak irabazi ditu, iaz porrotak jaso zituen pistatan ere bai: Sagunto (21-25), Rocasa (22-33), Murtzia (13-21) eta Alacanten (23-25) eta igo berri diren Kukullaga (16-33) eta Porriño (21-32) ere gainditu ditu.

Zenbaki hauekin, Bera Berak eskuan du bigarren postua. Halere, batzuen beharrak eta besteen nekeak sorpresak dakartzate, asteburu honetan Etxebarrin gertatu den bezala, beraz, une guztietan adi egotea komeni zaie donostiarrei.