Foru-legebiltzarreko lehendakariak harrera egin dio Akaba Bera Bera emakumezkoen eskubaloi-taldeari
Rafaela Romerok Akaba Bera Bera taldeari haren lana eta ibilbidea eskertu dizkio, eta, adierazi duenez, “gaur oso egun berezia da gure lurraldearentzat, gure esker ona eta omenaldia helaraziko baitizkiogu borrokalarien talde bati”. “Akaba Bera Bera taldeak urte honen hasieran berriz ere urrezko letrez idatzi zuen bere izena, Superkopan garaile izan baitzen; hori zuen historiako bigarren titulua da, aurreko edizioan Kopa lortu ondoren”. Romeroren esanetan, talde hau “emakumezkoen eskubaloiaren munduko handietako bat da”, eta omenaldi hau “benetan merezi duen talde batentzat eta zale batzuentzat da”, izan ere, “Akaba Bera Berari buruz hitz egitea Gipuzkoaren izena mundu osoan zabaldu duen eskubaloi-talde bati buruz hitz egitea da. Gipuzkoak izugarri eskertzen dizuete guztia, enbaxadorerik onena zarete, inork ez du zuek bezalako harrotasunez eraman Gipuzkoaren izena”.
Foru-legebiltzarreko lehendakariak azpimarratu duenez, omenaldi honekin, “Akaba Bera Bera taldearen arrakastak aitortzeaz gainera, eskubaloi talde handi honek etikaren eta kirol-espirituaren gainean eman digun ikasbidea ere aitortu nahi dugu.
Lehendakariak plaka bat eman dio Akaba Bera Bera taldeko kapitainari, “zuen kirol-ibilbidea eta izan dituzuen lorpenak aitortzeko”. Kapitainak, berriz, taldearen argazki bat eta taldekide guztiek sinatutako baloi bat eman dizkio lehendakariari.
